ໃນຕອນເຊົ້າ ວັນທີ 27 ທັນວາ 2024 ຢູ່ທີ່ສະໂມສອນໃຫຍ່ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປິດຊຸດຮຽນ ແລະມອບໃບຢັ້ງຢືນທິດສະດີການເມືອງຂັ້ນກາງ ໃຫ້ນັກສຶກສາທິດສະດີການເມືອງ ຂັ້ນກາງຮຸ່ນທີ III, ພາຍໃຕ້ການເປັນປະທານໂດຍ: ທ່ານ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຄະນະພັກ, ຄະນະນໍາ ສປມຊ, ມີແຂກຮັບເຊີນ, ມີພະນັກງານ, ຄູ-ອາຈານ ແລະນັກສຶກສາທຸກລະບົບ ທົ່ວ ສມປຊ ເຂົ້າຮ່ວມ 200 ກວ່າທ່ານ.
ໃນພິທີ ທ່ານ ປທ ແສງແກ້ວ ວົງລໍາພັນ ຮອງຫົວໜ້າກົມຄຸ້ມຄອງການຮຽນ-ການສອນ ໄດ້ຂຶ້ນຜ່ານບົດສະຫຼຸບການ ຈັດຕັ້ງປະຕິບັດຫຼັກສູດການຮຽນ-ການສອນ ທິດສະດີການເມືອງ ຂັ້ນກາງ ຮຸ່ນທີ III ປະຈໍາປີ ສົກ2024 ເຊິ່ງໄດ້ຍົກເນື້ອໃນບາງດ້ານວ່າ: ລະບົບທິດສະດີການເມືອງ ຂັ້ນກາງ ຮຸ່ນທີ III ມີນັກສຶກສາທັງໝົດ 56 ທ່ານ, ຍິງ 22 ທ່ານ, ໃນນັ້ນ, ໄດ້ມີການຈັດຕັ້ງ ຂອງຫ້ອງຮຽນເປັນລະບົບຄົບຊຸດ ໂດຍມີຄະນະພັກ-ຄະນະຫ້ອງ, ມີການແບ່ງເປັນຈຸ, ເປັນໜ່ວຍ, ພ້ອມທັງແຕ່ງຕັ້ງຄູປະຈຳຫ້ອງ 02 ທ່ານ ໃນການໃກ້ຊິດຕິດແທດ. ນັກສຶກສາລະບົບທິດສະດີການເມືອງ ຂັ້ນກາງ ຮຸ່ນທີ III ແມ່ນພະນັກງານຄຸ້ມຄອງ-ນໍາພາຂັ້ນຄະນະພະແນກ ທີ່ມາຈາກບັນດາກະຊວງ, ອົງການອ້ອມຂ້າງສູນກາງ. ລະບົບທິດສະດີການເມືອງ ຂັ້ນກາງ ຮຸ່ນທີ III ໄດ້ມີການຈັດຕັ້ງການຮຽນ-ການສອນ ທັງໝົດ 15 ວິຊາ ຫຼື 720 ຊົ່ວໂມງ, ລວມທັງຂຽນບົດປ້ອງກັນຈົບຂັ້ນ ແລະໄປທັດສະນະສຶກສາ ຢູ່ພາຍໃນນະຄອນຫຼວງວຽງຈັນ 1 ຄັ້ງ ແລະໄປທັດສະນະສຶກສາ ຢູ່ຕ່າງແຂວງ 5 ວັນ (ຢູ່ແຂວງວຽງຈັນ). ພ້ອມກັນນັ້ນ, ໄດ້ສໍາເລັດການຮຽນ, ການຂຽນບົດ ແລະສໍາເລັດການປ້ອງກັນ ໃນວັນທີ 25 ທັນວາ 2024. ຜ່ານການຕີລາຄາປະເມີນຜົນ ສາມາດຕີລາຄາໄດ້ ຄື: ໃນຈຳນວນນັກສຶກສາ ທັງໝົດ 56 ທ່ານ ສາມາດຍາດໄດ້ຄະແນນສະສົມເກຼດ A ຫຼື ດີເລີດ ມີ 43 ທ່ານ, ຍິງ 18 ທ່ານ ກວມ 76,78 %; ໄດ້ຮັບຄະແນນສະສົມເກຼດ B+ ຫຼື ດີຫຼາຍ ມີ 13 ທ່ານ, ຍິງ 04 ທ່ານ ກວມ 23,22%. ເວົ້າລວມແລ້ວ, ນັກສຶກສາທັງໝົດ ສາມາດປະຕິບັດແຜນການຮຽນ-ການສອນ ຄົບຖ້ວນໃນໂຄງການຫຼັກສູດຢ່າງຈົບງາມຮ້ອຍສ່ວນຮ້ອຍ.
ພ້ອມກັນນັ້ນ ທ່ານ ຈັນທະວີ ພັນທະວົງ ຄະນະພັກ, ຄະນະຫ້ອງກໍໄດ້ຕາງໜ້າໃຫ້ນັກສຶກສາທັງໝົດຂຶ້ນກ່າວຄວາມຮູ້ສຶກທີ່ໄດ້ມີຜົນສໍາເລັດໃນການຍົກລະດັບຄວາມຮູ້ທາງດ້ານທິດສະດີການເມືອງ ເຊິ່ງຈະເປັນເຂັມຊີ້ທິດໃນການປະຕິບັດໜ້າທີ່ການເມືອງຢູ່ໃນກົມກອງຂອງຕົນທີ່ສັງກັດ ໃຫ້ມີບາດກ້າວໃໝ່ ແລະມີການຫັນປ່ຽນໄປສູ່ຄຸນນະພາບທີ່ດີ ກວ່າເກົ່າ.
ໃນວາລະສຸດທ້າຍພິທີ ທ່ານປະທານໄດ້ມີຄໍາເຫັນໂອ້ລົມຕໍ່ກັບນັກສຶກສາທີ່ມີຜົນສໍາເລັດໃນການສຶກສາຄົ້ນຄວ້າ ເຊິ່ງທ່ານໄດ້ຕີລາຄາສູງຕໍ່ກັບຜູ້ທີ່ສໍາເລັດໃນຄັ້ງນີ້ຄື:
1). ຕ້ອງຮູ້ໝູນໃຊ້ສິ່ງທີ່ໄດ້ຮຽນຮູ້ມາຢ່າງປະດິດສ້າງ ເຂົ້າໃນວຽກງານຕົວຈິງໃຫ້ມີການຫັນປ່ຽນ ໃນພຶດຕິກໍາຢ່າງແທ້ຈິງຈຶ່ງ ຈະກໍ່ໃຫ້ເກີດຜົນປະໂຫຍດໃຫ້ແກ່ການສ້າງສາພັດທະນາປະເທດຊາດຂອງພວກເຮົາຢ່າງບໍ່ຢຸດຢັ້ງ ຄືດັ່ງກັບເນື້ອໃນກອງປະຊຸມໃຫຍ່ ຄັ້ງທີ XI ຂອງພັກທີ່ຮຽກຮ້ອງໃຫ້ພວກເຮົາຕ້ອງຄວາມກ້າຄິດ, ກ້າຮັບຜິດຊອບ, ຜັນຂະ ຫຍາຍເຂົ້າສູ່ຊີວິດຕົວຈິງ, ສ້າງການຫັນປ່ຽນຢ່າງແຂງແຮງເລິກເຊິ່ງ, ທິດສະດີ, ແນວທາງທີ່ໄດ້ຮຽນມາຕ້ອງໄດ້ຮັບການທົດສອບ, ກວດສອບ ແລະຢືນຢັນຈາກພຶດຕິກຳຕົວຈິງ.
2). ຮຽກຮ້ອງບັນດານັກສຶກສາ ຖືເອົາບົດຮຽນທີ່ໄດ້ຈາກພຶດຕິກໍາຕົວຈິງນັ້ນແລ້ວ ຍັງມີໜ້າທີ່ຄົ້ນຄວ້າວິໄຈ ແລະສະຫຼຸບສັງລວມຢ່າງມີວິທະຍາສາດ ແລ້ວສະເໜີຄໍາຄິດ-ຄໍາເຫັນ, ສະເໜີທິດທາງ, ວິທີການ ແລະມາດຕະການທີ່ເປັນໄປໄດ້ ແລະມີປະສິດທິພາບສູງ.
3). ຈົ່ງສືບຕໍ່ກໍ່ສ້າງ, ພັດທະນາຕົນເອງ, ຮູ້ນໍາເອົາບົດຮຽນໄປໝູນໃຊ້ໃນພຶດຕິກຳໃຫ້ເກີດດອກອອກຜົນ, ປະ ດິດສ້າງ, ກ້າຄິດ, ກ້າເຮັດ, ກ້າຮັບຜິດຊອບໃນການປ່ຽນແປງຈາກອັນເກົ່າໄປສູ່ອັນໃໝ່ທີ່ດີກວ່າ.
4). ຮັກສາຊື່ສຽງ, ກຽດສັກສິຂອງຕົນ ກໍຄືຂອງສະຖາບັນໃນການເຄື່ອນໄຫວ, ການປະພຶດທຸກຢ່າງຕ້ອງໄດ້ຮັບຄວາມໄວ້ເນື້ອເຊື່ອໃຈຈາກພັກ-ລັດ ແລະປະຊາຊົນ ທີ່ໄດ້ຝາກຄວາມຫວັງໄວ້; ເພາະສະນັ້ນ, ບໍ່ວ່າຢູ່ແຫ່ງຫົນໃດ, ໃນໜ້າທີ່ວຽກງານໃດ, ຈະຄິດ, ປະພຶດ ແລະກະທຳອັນໃດ ກໍຕ້ອງຄໍານຶງ ແລະຢຶດໝັ້ນໃນທາດແທ້ຊົນຊັ້ນກຳມະກອນຂອງພັກຢ່າງສະເໝີຕົ້ນສະເໝີປາຍ.
ຂ່າວ/ພາບ: ພະແນກຄົ້ນຄວ້າວິໄຈຂ່າວ
ບັນນາທິການ: ປທ ວຽງສະຫວັນ