ກອງປະຊຸມໃຫຍ່ໜ່ວຍພັກຮາກຖານ ນັກຄົ້ນຄວ້າປະລິນຍາໂທ ຮຸ່ນທີ XX (ຫ້ອງ ຂ) ໄດ້ໄຂຂຶ້ນໃນເວລາ 8 ໂມງ 00 ນາທີ ຂອງວັນທີ 24 ມັງກອນ 2025 ທີ່ຫ້ອງຮຽນ (110), ຕຶກກົມຈັດຕັ້ງ-ພະນັກງານ, ໂດຍການເປັນທານຂອງ ສະຫາຍ ປອ ດາວສະຫວັນ ເຄືອມີໄຊ ຄະນະປະຈຳພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ເປັນປະທານ, ມີສະຫາຍ ປທ ນາງ ພອນໄຊ ລາດສະວົງ ຄະນະບໍລິຫານງານພັກ, ຫົວໜ້າກົມຈັດຕັ້ງ-ພະນັກງານ ແລະ ສະຫາຍ ອິນທອງ ດວງປະເສີດ ເລຂາໜ່ວຍພັກ, ຫົວໜ້າຫ້ອງຮຽນນັກຄົ້ນຄວ້າປະລິນຍາໂທຮຸ່ນທີ XX (ຫ້ອງຂ) ເປັນຄະນະປະທານ, ກອງປະຊຸມໄດ້ດໍາເນີນເປັນເວລາ 1 ຕອນ; ເຊິ່ງມີຜູ້ເຂົ້າຮ່ວມທັງໝົດ 78 ສະຫາຍ, ຍິງ 19 ສະຫາຍ, ໃນນັ້ນ, ຜູ້ແທນສົມບູນ 67, ຍິງ 16 ສະຫາຍ, ແຂກທີ່ຖືກເຊີນ 11 ສະຫາຍ, ຍິງ 3 ສະຫາຍ.
ໃນກອງປະຊຸມສະຫາຍ ອິນທອງ ດວງປະເສີດ ເລຂາໜ່ວຍາພັກ, ຫົວໜ້າຫ້ອງຮຽນນັກຄົ້ນຄວ້າປະລິນຍາໂທ ຮຸ່ນທີ XX (ຫ້ອງ ຂ) ໄດ້ຂຶ້ນກ່າວເປີດກອງປະຊຸມໃຫຍ່ ແລະຜ່ານບົດສະຫຼຸບການເຄືອນໄຫວຊີ້ນໍາ-ນໍາພາ ໃນໄລຍະ 3 ເດືອນຜ່ານມາ ປະຈໍາປີ 2024 ແລະທິດທາງແຜນການປີ 2025-2026, ເຊິ່ງໃນນັ້ນ ໄດ້ກ່າວເຖິງສະພາບລວມ ແລະຜົນງານການເຄື່ອນໄຫວບາງດ້ານ ເປັນຕົ້ນແມ່ນດ້ານການເມືອງ-ແນວຄິດ ຕະຫຼອດໄລຍະ 3 ເດືອນທີ່ຜ່ານມາຄະນະໜ່ວຍພັກ ຄະນະຫ້ອງໄດ້ເອົາໃຈໃສ່ ນໍາພາສະມາຊິກພັກປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ, ຖືເອົາວຽກງານການສຶກສາ ອົບຮົມການເມືອງ-ແນວຄິດເປັນກົກສອດຫ້ອຍເຂົ້າໃນທຸກຂົງເຂດວຽກງານດ້ວຍການຖືເອົາການຄົ້ນຄວ້າຮໍ່າຮຽນ ເປັນບັນຫາສໍາຄັນເປັນຕົ້ນຕໍແມ່ນໄດ້ນຳພາ ຊີ້ນຳສະມາຊິກພັກເຂົ້າຮ່ວມພິທີສະເຫຼີມສະຫຼອງວັນສໍາຄັນຕ່າງໆຂອງພັກ, ຂອງຊາດ ແລະເຊື່ອມຊື່ມບັນດາເອກະສານສໍາຄັນທີ່ສະຖາບັນການເມືອງແລະການປົກຄອງແຫ່ງຊາດຈັດຂຶ້ນ ຈໍານວນ 10 ຄັ້ງ ແລະກອງປະຊຸມເຊື່ອມຊຶມ, ເຜີຍແຜ່ແຈ້ງການຕ່າງໆ, ລວມມີຜູ້ເຂົ້າຮ່ວມທັງໝົດ ຈໍານວນ 545 ເທື່ອສະຫາຍ, ຍິງ 166 ເທື່ອສະຫາຍ.
ກອງປະຊຸມໃຫຍ່ ໄດ້ພ້ອມກັນໃຊ້ສິດປະຊາທິປະໄຕຂອງານຕົນປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ, ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງຈຳນວນ 7 ສະຫາຍ, ຍິງ 2 ສະຫາຍ; ໃນນີ້, ໄດ້ເລືອກເອົາ 5 ສະຫາຍ, ຍິງ 2 ສະຫາຍ ເພື່ອເປັນແກນນຳໃນການນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ມີຜົນສຳເລັດຕາມແຜນການທີ່ໄດ້ກຳນົດໄວ້.
ກອງປະຊຸມຄົບຄະນະໜ່ວຍພັກຮາກຖານ ນັກຄົ້ນຄວ້າປະລິນຍາໂທ ຮຸ່ນທີ XX (ຫ້ອງ ຂ) ໄດ້ເປັນເອກະພາບກັນເລືອກເອົາຄະນະພັກ ມີລາຍຊື່ດັ່ງນີ້:
1). ສະຫາຍ ອິນທອງ ດວງປະເສີດ ເປັນເລຂາໜ່ວຍພັກ
2). ສະຫາຍ ນາງ ປິ່ນຄໍາ ພົມມະຈິດ ເປັນຮອງເລຂາໜ່ວຍພັກ
3). ສະຫາຍ ກໍລິດາ ເລົາທະວົງ ເປັນຄະນະໜ່ວຍພັກ ພ້ອມທັງເຮັດວຽກງານກວດກາພັກ
4). ສະຫາຍ ສິງເພັດ ວິທະຍາພອນ ເປັນກຳມະການພັກ
5). ສະຫາຍ ນາງ ອໍາໄພ ຄຳມຸງຄຸນ ເປັນກຳມະການພັກ
![](https://www.nappa.gov.la/wp-content/uploads/2025/01/WhatsApp-Image-2025-01-25-at-12.23.53.jpeg)
ໃນຕອນທ້າຍກອງປະຊຸມໄດ້ຮັບຟັງການໂອ້ລົມຈາກ ສະຫາຍ ປອ ດາວສະຫວັນ ເຄືອມີໄຊ ຄະນະປະຈຳພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ສະຫາຍໄດ້ເນັ້ນໜັກ 5 ດ້ານ ຄື:
1). ເພີ່ມທະວີຄວາມສາມັກຄີ, ແລະຄວາມເປັນເອກະພາບ ໂດຍສະເພາະຄະນະໜ່ວຍພັກທັງ 5 ສະຫາຍ;
2). ເພີ່ມທະວີວຽກງານສຶກສາອົບຮົມການເມືອງແນວຄິດ, ສ້າງຄວາມຕື່ນຕົວໃຫ້ແກ່ສະມາຊິກພາຍໃນຮາກຖານ, ກຳໄດ້ແນວຄິດບັນດາເປົ້າໝາຍ ມີຄວາມເຊື່ອໝັ້ນຕໍ່ການນໍາພາຂອງພັກ-ລັດ;
3). ນໍາພາສະມະຊິກພັກເຂົ້າຮ່ວມ ຂະບວນການຕ່າງໆ, ບຸກບືນພັດທະນາຕົນເອງດ້ວຍຫຼາຍວິທີການ ເປັນຕົ້ນແມ່ນຂະບວນການຄົ້ນຄວ້າຮໍ່າຮຽນ ແລະກໍາແໜ້ນຫຼັກການວິທີການວິທະຍາ;
4). ເປັນເຈົ້າການໃນການປະຕິບັດລະບຽບວິໄນ, ບັນດາກົດລະບຽບຂອງນັກສຶກສາ ແລະບັນດາກົດລະບຽບຕ່າງໆ ທີ່ສະຖາບັນການເມືອງ ແລະ ການປົກຄອງແຫ່ງຊາດ ວາງອອກ;
5). ເອົາໃຈໃສ່ໃນການແບ່ງວຽກງານ, ໜ້າທີ່ຮັບຜິດຊອບພາຍໃນຄະນະໜ່ວຍພັກ.
![](https://www.nappa.gov.la/wp-content/uploads/2025/01/WhatsApp-Image-2025-01-25-at-12.23.52-1.jpeg)
ຂ່າວ/ພາບ: ນາງ ທິດດາວອນ ດວງປະເສີດ
ບັນນາທິການ: ປທ ວຽງສະຫວັນ ຈັນທະວີໄຊ