ໃນຕອນແລງວັນທີ 21 ມີນາ 2025 ທີ່ສະໂມສອນໃຫຍ່ ສະຖາບັນການເມືອງ ແລະ ການປົກຄອງແຫ່ງຊາດ, ວິທະຍຸໂທລະພາບສູນກາງຈີນ CMG ປະຈໍາລາວ ຮ່ວມກັບ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດງານເສວະນາ ເຜີຍແຜ່ຜົນສຳເລັດ ຂອງກອງປະຊຸມສອງສະພາຂອງ ສປ ຈີນ ພາຍໃຕ້ຫົວຂໍ້: “ຈີນໃນລະດູບານໃໝ່: ໂອກາດຂອງຈີນ ທົ່ວໂລກຊົມໃຊ້”ຂຶ້ນທີ່ສະຖາບັນການເມືອງ ແລະ ການປົກຄອງແຫ່ງຊາດ. ຕາງໜ້າຝ່າຍຈີນເຂົ້າຮ່ວມໂດຍທ່ານ ນາງ ຟາງຫົງ, ເອກອັກຄະລັດຖະທູດ ແຫ່ງ ສປ ຈີນ ປະຈຳ ລາວ, ຕາງໜ້າຝ່າຍລາວເຂົ້າຮ່ວມໂດຍທ່ານ ຮສ ພູວົງ ອຸ່ນຄໍາແສນ, ກຳມະການສູນກາງພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ພ້ອມນັ້ນ ກໍມີນັກສຳມະນາກອນ, ນັກຄົ້ນຄວ້າ, ນັກວິທະຍາສາດ ຂອງຝ່າຍ ຈີນ ແລະ ຝ່າຍລາວ, ມີພະນັກງານ, ຄູ-ອາຈານ ຕະຫຼອດຮອດນັກສຶກສາທຸກຮຸ່ນ, ທຸກລະບົບທົວ ສມປຊ ເຂົ້າຮ່ວມ ລວມທັງໝົດ 374 ທ່ານ, ຍິງ 127 ທ່ານ.
ຈຸດປະສົງໃນການຈັດກອງປະຊຸມໃນຄັ້ງນີ້ ແມ່ນຈະໄດ້ຮັບຟັງລາຍງານຜົນສໍາເລັດກອງປະຊຸມ ຂອງສອງສະພາ ຂອງຈີນ ແລະຮັບຟັງການແລກປ່ຽນຄໍາຄິດເຫັນເສວະນາ ຂອງນັກວິທະຍາສາດ ຈາກພາກສ່ວນຕ່າງໆ ພາຍໃຕຫົວຂໍ້: “ຈີນໃນລະດູບານໃໝ່: ໂອກາດຂອງຈີນ ທົ່ວໂລກຊົມໃຊ້”.
ໃນພິທີ ທ່ານ ຮສ. ພູວົງ ອຸ່ນຄໍາແສນ, ກຳມະການສູນກາງພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໄດ້ກ່າວຊົມເຊີຍຜົນສຳເລັດກອງປະຊຸມສອງສະພາ ແລະກ່າວເປີດພິທີ, ພ້ອມທັງເນັ້ນໃຫ້ຜູ້ທີ່ເຂົ້້າຮ່ວມຈົ່ງເອົາໃຈໃສ່ຮັບຟັງ ແລະເຂົ້າຮ່ວມສຸດກົກສຸດປາຍຢ່າງພ້ອມພຽຽ, ພ້ອມກັນນັ້ນ ຍັງໄດ້ຮັບຊົມ ແລະຮັບຟັງ ການລາຍງານຜົນສໍາເລັດກອງປະຊຸມສອງສະພາ ຂອງຈີນ ຈາກທ່ານ ເຊີ້ນຫາຍຊົງ ຮອງຫົວໜ້າໂຄສະນາອົບຮົມສູນກາງພັກຄອມມູນິດຈີນ, ປະທານວິທະຍຸ-ໂທລະພາບສູນກາງງຈີນ ໃນຮູບແບບອອນລາຍ.
ຫຼັງຈາກນັ້ນ ທ່ານ ນາງ ຟາງຫົງ ເອກອັກຄະລັກຖະທູດຜູ້ມີອຳນາດເຕັມ ຈາກ ສປ ຈີນປະຈໍາລາວ ຂຶ້ນມີຄໍາເຫັນຕໍ່ກອງປະຊຸມ, ເຊິ່ງທ່ານໄດ້ລາຍງານຜົນກອງປະຊຸມສອງສະພາຂອງຈີນເປັນຕົ້ນແມ່ນ: ການສົ່ງເສີມເອໄອພາຍໃນປະເທດ ນໍາໂດຍດິບສິກ (deepseek), ການກະຕຸກຊຸກຍູ້ທາງດ້ານເສດຖະກິດ ທີ່ຂະຫຍາຍຕົວຊ້າໃຫ້ຂະຫຍາຍຕົວໄວຂຶ້ນ, ການສ້າງກຳລັງທະຫານຂອງຈີນ ໃຫ້ມີຄວາມເຂັ້ມແຂງ, ການຮັກສາຄວາມໝັ້ນຄົງທາງອາຫານ ແລະບັນຫາອື່ນໆທີ່ສໍາຄັນ ໃນການພັດທະນາຂອງຈີນ ທີ່ແຍກອອກຈາກໂລກບໍ່ໄດ້ ແລະຄວາມຈະເລີນຮຸ່ງເຮືອງຂອງໂລກ ກໍຕ້ອງການປະເທດ ຈີນເຊັ່ນກັນ.
ພ້ອມກັນນັ້ນໃນພິທີ ຍັງໄດ້ຮັບຟັງການນໍາສະເໝີ 6 ບົດ ຄື:
- ການຫັນເປັນທັນສະໄໝແບບຈີນ ແລະການພັດທະນາດ້ວຍຄຸນນະພາບສູງຂອງຈີນ, ນໍາສະເໜີໂດຍທ່ານ ປອ ດາວສະຫວັນ ເຄືອມີໄຊ, ຄະນະປະຈຳພັກ, ຮອງ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ;
- ສາຍພົວພັນລະຫວ່າງພັກກັບປະຊາຊົນ, ນໍາສະເໜີໂດຍ: ທ່ານ ປອ. ຄໍາມອນ ຈັນທະຈິດ, ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ປະຈຳການຮອງປະທານ ສະພາທິດສະດີສູນກາງພັກ;
- ນະໂຍບາຍການຕ່າງປະເທດຂອງຈີນ, ນໍາສະເໜີໂດຍ: ທ່ານ ອະໂສກະ ຣາຊະພົນ, ຮອງຫົວໜ້າສະຖາບັນຕ່າງປະເທດ, ກະຊວງຕ່າງປະເທດ;
- ການພັດທະນາເຕັກໂນໂລຊີ ກໍຄື AI ຂອງ ຈີນ, ນໍາສະເໜີໂດຍ: ທ່ານ ທິນນະກອນ ບົວສະຫວັນ, ຜູ້ອໍານວຍການ ບໍລິສັດເມົາຕິມີເດັຍ ແລະ ເຕັກໂນໂລຊີ ຊູລູຊັ້ນ ຈຳກັດຜູ້ດຽວ;
- ການພົວພັນ ແລະ ການຮ່ວມມື ຂອງ ແຂວງຫຼວງພະບາງ ກັບ ສປ ຈີນ, ທ່ານ ວົງດາວອນ ວົງໄຊຍະລາດ, ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫຼວງພະບາງ;
- ການພົວພັນ ແລະການຮ່ວມມື ຂອງ ແຂວງຫຼວງນໍ້າທາ ກັບ ສປ ຈີນ” ທ່ານ ຫຸມເພັງ ວຽງທອງໄຊ, ຮອງພະແນກອຸດສາຫະກຳການຄ້າ ແຂວງຫລວງນໍ້າທາ.
ຫຼັງຈາກນັ້ນ ແມ່ນໄດ້ເປີດໂອກາດໃຫ້ຜູ້ເຂົ້າຮ່ວມທັງໝົດມີການຖາມ-ຕອບແລກປ່ຽນຄໍາເຫັນ ຢ່າງກົງໄປກົງມາ.
ໃນຕອນທ້າຍພິທີທ່ານ ປອ ດາວສະຫວັນ ເຄືອມີໄຊ, ຄະນະປະຈຳພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໄດ້ກ່າວປິດງານເສວະນາ ວ່າ: ຄັ້ງນີ້ເປັນການຮ່ວມມືກັນຈັດ ລະຫວ່າງ ສະຖາບັນການເມືອງ ແລະ ການປົກຄອງແຫ່ງຊາດ ແລະ ວິທະຍຸໂທລະພາບສູນກາງຈີນ CMG, ພ້ອມທັງຮຽກຮ້ອງມາຍັງບັນດາຜູ້ແທນທີ່ເຂົ້າຮ່ວມ, ໂດຍສະເພາະນັກສຶກສາ ຂອງສະຖາບັນພວກເຮົາທີ່ມາຈາກຕ່າງແຂວງໃນຂອບເຂດທົ່ວປະເທດນຳເອົາຜົນສຳເລັດຂອງກອງປະຊຸມນີ້ນຳໄປເຜີຍແຜ່ຢູ່ບັນດາແຂວງ ຂອງຕົນຕື່ມ ແລະນໍາໃຊ້ເຂົ້າໃນພຶດຕິກໍາຕົວຈິງ. ພ້ອມທັງສະແດງຄວາມຂອບໃຈມາຍັງວິທະຍຸໂທລະພາບສູນກາງຈີນ CMG ທີ່ໄດ້ມີການຮ່ວມມືກັບຝ່າຍລາວເປັນຢ່າງດີ ໃນການຮວ່ມມືກັນຈັດຫຼາຍກິດຈະກຳນັບທັງຢູ່ນະຄອນຫຼວງວຽງຈັນ ແລະ ຢູ່ຕ່າງແຂວງໃນຂອບເຂດທົ່ວປະເທດລາວ ບໍ່ວ່າຈະເປັນການຈັດງານເສວະນາ, ການລົງເກັບກຳຂ່າວ ຫຼື ການເດີນສາຍຮູບເງົາດີເດັ່ນລາວ-ຈີນ ໃຫ້ປະຊາຊົນລາວໄດ້ຮັບຊົມຢ່າງກວ້າງຂວາງ, ພ້ອມທັງສະແດງຄວາມຂອບໃຈ ແລະ ຊົມເຊີຍມາຍັງ ທ່ານ ນາງ ແສງແກ້ວ ຫົວໜ້າວິທະຍຸໂທລະພາບສູນກາງຈີນປະຈຳລາວ ທີ່ໄດ້ປະກອບສ່ວນຢ່າງຫ້າວຫັນໃນການຮ່ວມມືເຮັດວຽກກັບຝ່າຍລາວ ໃນການເສີມຂະຫຍາຍສາຍພົວພັນມິດຕະພາບການຮວ່ມມືຮອບດ້ານ ແລະ ການເປັນຄູ່ຮ່ວມຊະຕາກຳລາວ-ຈີນ ຢ່າງສຸດໃຈ.
ພາບ/ຂ່າວ: ນາງ ທິດດາວອນ ດວງປະເສີດ
ບັນນາທິການ: ປທ ວຽງສະຫວັນ ຈັນທະວີໄຊ