ໃນຕອນແລງຂອງວັນທີ 20 ມີນາ 2025 ທີ່ສະໂມສອນໂຮງຮຽນການເມືອງ ແລະ ການປົກຄອງ ແຂວງຊຽງຂວາງ ໄດ້ຈັດພິທີປາຖະກະຖາ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ (22 ມີນາ 1955-22 ມີນາ 2025) ແລະ ແລກປ່ຽນບົດຮຽນອັນພົ້ນເດັ່ນ ໃນການເປັນເສນາທິການຂອງພັກ ໂດຍການເປັນປະທານ ຂອງ ທ່ານນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງ, ມີທ່ານ ສີວອນ ບຸດດາຈັນ ກຳມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງ, ມີບັນດາທ່ານກຳມະການພັກແຂວງ, ເລຂາ-ຮອງເລຂາ, ຫົວໜ້າ-ຮອງຫົວໜ້າ, ສະມາຊິກພັກ ຂອງ 6 ຂົງເຂດອົງການເສນາທິການຂອງພັກ ຕະຫຼອດຮອດພະນັກງານ, ຄູ-ອາຈານ ແລະ ນັກສຶກສາທິດສະດີການເມືອງຂັ້ນກາງ ຮຸ່ນທີ 3 ເຂົ້າຮ່ວມທັງໝົດ 101 ທ່ານ, ຍິງ 42 ທ່ານ.
ໃນພິທີ ທ່ານ ສີວອນ ບຸດດາຈັນ ກຳມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງ ກໍໄດ້ໃຫ້ກຽດຂຶ້ນເລົ່າມູນເຊື້ອ 70 ປີ ວັນສ້າງຕັ້ງພັກປະຊາຊົນ ປະຕິວັດລາວ ເຊິ່ງທ່ານໄດ້ຍົກໃຫ້ເຫັນເຖິງໄຊຊະນະອັນຍິ່ງໃຫຍ່ ຂອງການປະຕິວັດ ພາຍໃຕ້ການນຳພາອັນສະຫຼາດສ່ອງໃສ ຂອງພັກ ພ້ອມທັງເປັນການລະນຶກເຖິງຄຸນງາມຄວາມດີ, ນໍ້າໃຈເສຍສະຫຼະເລືອດເນື້ອ ເພື່ອປະເທດຊາດ ຂອງບັນດານັກຮົບປະຕິວັດ ທີ່ຕໍ່ສູ້ປົດປ່ອຍຊາດຢ່າງພິລະອາດຫານ ທີ່ນຳໄປສູ່ໄຊຊະນະຂອງການປະຕິວັດຊາດ ແລະ ການຈັດຕັ້ງປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໄປຕາມເສັ້ນທາງສັງຄົມນິຍົມ ເພື່ອຄວາມຢູ່ເຢັນເປັນສຸກຂອງປະຊາຊົນລາວບັນດາເຜົ່າ. ໃນວາລະດັ່ງກ່າວນັ້ນ ທ່ານ ບຸນຊູ ອິດທິພົນ ຮອງເລຂາໜ່ວຍພັກ ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງ ກໍໄດ້ໃຫ້ກຽດຂຶ້ນຜ່ານເນື້ອໃນເອກະສານ 70 ປີ ພາຍໃຕ້ການນຳພາ ຂອງພັກ ໂຮງຮຽນການເມືອງ ແລະ ການປົກຄອງແຂວງ ມີບົດບາດເຕີບໃຫຍ່ເຂັ້ມແຂງ ແລະ ພົ້ນເດັ່ນໃນຫຼາຍດ້ານ ເຊິ່ງທ່ານໄດ້ເນັ້ນໜັກໃຫ້ເຫັນເຖິງບົດບາດການນຳພາ-ຊີ້ນຳ ໃນການຄົ້ນຄວ້າທິດສະດີ ແລະ ພຶດຕິກຳ, ການນຳພາ-ຊີ້ນຳ ຈັດຕັ້ງຝຶກອົບຮົມທິດສະດີການເມືອງ ແລະ ການປົກຄອງ ໃຫ້ແກ່ສະມາຊິກພັກ, ພະນັກງານ-ລັດຖະກອນ, ນາທະຫານ, ນາຍຕຳຫຼວດ ທີ່ມີຕຳແໜ່ງລະດັບກາງ, ລະດັບຕົ້ນ, ຂັ້ນແຂວງ, ຂັ້ນເມືອງ ແລະ ຂັ້ນບ້ານ, ເປັນເຈົ້າການນຳພາ-ຊີ້ນຳດ້ານວິຊາສະເພາະ ແລະ ວິຊາການ ຕໍ່ສູນຝຶກອົບຮົມທິດສະດີການເມືອງ ແລະ ການປົກຄອງຂັ້ນເມືອງ, ພະແນກ ການອ້ອມຂ້າງແຂວງ ແລະ ຊຸດຝຶກອົບຮົມໃຫ້ແກ່ຄະນະພັກ ແລະ ອົງການປົກຄອງຂັ້ນບ້ານ. ຈາກນັ້ນ ທ່ານ ຄຳສີ ວິໄລສັກ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານເອກະສານພາລະບົດບາດ, ໜ້າທີ່ຄວາມຮັບຜິດຊອບ ຂອງຄະນະພັກ, ຄະນະຈັດຕັ້ງແຂວງ ກ່ຽວກັບວຽກພັກ-ພະນັກງານ, ທ່ານ ນາງ ສົມພອນ ບູ່ທະລາ ຮອງຫົວໜ້າຫ້ອງວ່າ ການແຂວງ ໄດ້ຂຶ້ນຜ່ານບົດບາດການເປັນເສນາໃຫ້ການນຳ, ທ່ານ ວັນນະສິນ ຜະລິຈັນ ຮອງຫົວໜ້າຄະນະໂຄສະນາອົບຮົມແຂວງ, ໄດ້ຂຶ້ນຜ່ານເອກະສານ 70 ປີ ພາຍໃຕ້ການນຳພາຂອງພັກ ຕໍ່ກັບວຽກງານໂຄສະນາອົບຮົມ ຢູ່ແຂວງຊຽງຂວາງ, ທ່ານ ສຸພັນ ກາລະຈັກ ຮອງພະແນກການຕ່າງປະເທດ ໄດ້ນຳສະເໜີວຽກງານທີ່ພົ້ນເດັ່ນໃນການເປັນເສນາທິການ ຂອງພະແນກການຕ່າງປະເທດ, ທ່ານ ນາງ ວັນໄຊ ສິງດາລາ ຮອງປະທານກວດກາ-ພັກ ລັດ ແຂວງ ໄດ້ຂຶ້ນຜ່ານການເຕີບໃຫຍ່ ຂອງວຽກງານກວດກາ ພາຍໃຕ້ການນຳພາຂອງພັກ.
ໃນຕອນທ້າຍພິທີ ທ່ານນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງ ກໍຍັງໄດ້ໃຫ້ກຽດໂອ້ລົມຕໍ່ພິທີ ກ່ອນອື່ນໝົດ ທ່ານກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດອັນຈົບງາມທີ່ຍາດມາໄດ້ ໃນຕະຫຼອດໄລຍະພາຍໃຕ້ການນຳພາ ຂອງພັກ, ພ້ອມນີ້ທັງຮຽກຮ້ອງມາຍັງສະມາຊິກພັກ, ພະນັກງານ-ລັດ ຖະກອນ ແລະ ນັກສຶກສາທີ່ເຂົ້າຮ່ວມທັງໝົດ ຈົ່ງເອົາໃຈໃສ່ໃນໜ້າທີ່ວຽກງານທີ່ຕົນຮັບຜິດຊອບ, ຢຶດໝັ້ນໃນຊົນຊັ້ນກຳມະກອນ ແລະ ຄວາມຈົງຮັກພັກດີ ຕໍ່ພັກ ຕໍ່ຊາດ, ຕັ້ງໜ້າປະຕິບັດໜ້າທີ່ການເມືອງ ເພື່ອບັນລຸຕາມຈຸດປະສົງ ແລະ ຄາດໝາຍທີ່ວາງໄວ້.
ພາບ-ຂ່າວ: ໄຊສົມແພງ ສີສົມບັດ
(ໂຮງຮຽນການເມືອງ ແລະ ການປົກຄອງ ແຂວງຊຽງຂວາງ)
ບັນນາທິການ: ປທ ວຽງສະຫວັນ ຈັນທະວີໄຊ