ຕອນເຊົ້າ ວັນທີ 27 ມີນາ 2025 ທີ່ຫ້ອງປະຊຸມ ຊັ້ນ 1 ຕຶກສູນຂໍ້ມູນຂ່າວສານການເມືອງ ແລະການປົກຄອງ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດງົບປະມານ ປະຈຳປີ 2024 ແລະ ແຈ້ງຕົວເລກແຜນງົບປະມານລາຍຈ່າຍປົກກະຕິ ປະຈຳປີ 2025 ) ໃຫ້ກຽດເປັນປະທານໂດຍ: ທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຄະນະພັກ, ຄະນະອຳ ນວຍການ, ມີຕາງໜ້າກົມ, ຄະນະຕ່າງໆ, ສູນຕ່າງໆ ແລະພະນັກງານໃນພະແນກການເງິນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ ລວມທັງໝົດ 35 ທ່ານ, ຍິງ 12 ທ່ານ.
ໃນກອງປະຊຸມ ທ່ານ ປທ ບຸນທະວີ ບັນດາສັກຫົວໜ້າພະແນກແຜນການ-ການເງິນ, ໄດ້ຜ່ານບົດສະຫຼຸບການຈັດຕັ້ງປະຕິບັດງົບປະມານ ປະຈຳປີ 2024 ແລະ ແຈ້ງຕົວເລກແຜນງົບປະມານລາຍຈ່າຍປົກກະຕິ ປະຈຳປີ 2025 ) ໄດ້ຍົກໃຫ້ເຫັນບາງດ້ານ ຄື: ວຽກງານງົບປະມານ ແລະ ການລົງທຶນຂອງລັດ ໄດ້ສໍາເລັດການຈັດກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານປະຈໍາປີ 2023 ແລະ ແຈ້ງຕົວເລກແຜນງົບປະມານປະຈໍາປີ 2024; ໄດ້ສໍາເລັດການເຮັດບົດສະຫຼຸບຂາດຕົວການຈັດຕັ້ງປະຕິບັດງົບປະມານປີ 2023; ໄດ້ສໍາເລັດການເຮັດສະຫຼຸບຜົນຂອງການຈັດຕັ້ງປະຕິບັດ ປະຈໍາ 3 ເດືອນ, 6 ເດືອນ, 9 ເດືອນ ແລະ ປະຈຳປີ ແລະເອກະສານລາຍງານການເງິນ ສົ່ງໃຫ້ກົມງົບປະມານ, ຄັງເງິນແຫ່ງຊາດ, ກົມບັນຊີ ກະຊວງການເງິນ ທັນຕາມກຳນົດເວລາ.
ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຮັບແຈ້ງແຜນງົບປະມານ ປະຈຳປີ 2024 ທັງໝົດ 29.853.000.000 ກີບ, ແຜນການດັດແກ້ 29.853.000.000 ກີບ, ຕົວເລກທີ່ໄດ້ຮັບອະນຸມັດ 29.853.000.000 ກີບ, ສາມາດຈັດຕັ້ງປະຕິບັດໄ ດ້ 28.079.164 .856 ກີບ, ເທົ່າກັບ 94,06%
ນອກນັ້ນ, ໃນພິທີຍັງໄດ້ຮັບຟັງ ຄໍາແນະນໍາວ່າດ້ວຍການປະຕິບັດແຜນງົບປະມານແຫ່ງລັດ ປີ 2025. ຜ່ານຂໍ້ຕົກລົງເພີ່ມເຕີມວ່າດ້ວຍການປັບປຸງບາງມາດຕາ ຂອງຂໍ້ຕົກລົງວ່າດ້ວຍການໃຊ້ຈ່າຍ ງົບປະມານຂອງລັດ, ປະຢັດ ແລະຕ້ານການຟູມເຟືອຍ ສະບັບເລກທີ 0200/ກງ.
ພ້ອມນີ້, ໃນທີ່ປະຊຸມ ໄດ້ພ້ອມກັນປະກອບຄຳຄິດຄຳເຫັນໃຫ້ບົດສະຫຼຸບການຈັດຕັ້ງປະຕິບັດງົບປະມານ ປະ ຈຳປີ 2024 ແລະ ແຈ້ງຕົວເລກແຜນງົບປະມານລາຍຈ່າຍປົກກະຕິ ປະຈຳປີ 2025 ) ເພື່ອຊອກໃຫ້ເຫັນດ້ານດີ ແລະແກ້ໄຂຈຸດອ່ອນ ທັງເປັນການປຶກສາຫາລືແຜນການຈັດຕັ້ງປະຕິບັດໃນຕໍ່ໜ້າ ຂອງພະແນກແຜນການ-ການເງິນ ສມປຊ ໃຫ້ມີປະສິດທິຜົນດີຂຶ້ນກວ່າເກົ່າ.
ໃນຕອນທ້າຍກອງປະຊຸມ ເພື່ອເປັນທິດເຍືອງທາງໃນການຈັດຕັ້ງປະຕິບັດແຜນງົບປະມານໃນປີ 2025 ນີ້ທ່ານປະທານ ໄດ້ໃຫ້ທິດຊີ້ນຳວ່າ:
- ໃຫ້ເຂົ້າໃຈເປັນເອກະພາບຕາມລະບຽບຫຼັກການ, ນິຕິກໍາ, ຕາມງົບປະມານ ແລະແຜນງົບປະມານການເງິນ.
- ເອົາໃຈໃສ່ຂຶ້ນແຜນຕາມພາລະບົດບາດ, ຄວາມຮັບຜິດຊອບຂອງຕົນເອງ ແລະການປະສານງານກໍ່ໃຫ້ມີຄວາມເປັນເອກະພາບລະອຽດ, ຈະແຈ້ງ.
- ຈົ່ງນໍາເອົາເນື້ອໃນຈິດໃຈ ຂອງກອງປະຊຸມໄປເຜີຍແຜ່, ຢູ່ໃນກົມກອງຂອງຕົນໃຫ້ເຂົ້າໃຈເລິກເຊິ່ງ ແລະສ້າງຄວາເຂົ້າໃຈ ແລະນໍາເອົາໄປປະຕິບັດ.
- ໃຫ້ບັນດາກົມ, ຫ້ອງການ, ສູນຂໍ້ມູນຂ່າວສານ, ສູນຄົ້ນຄວ້າແນວຄິດ ໄກສອນ ພົມວິຫານ ແລະຄະນະຕ່າງໆ ເປັນເຈົ້າການສ້າງແຜນລາຍຈ່າຍງົບປະມານປົກກະຕິ ແລະແຜນລາຍຈ່າຍງົບປະມານວິຊາການ, ການປະກອບເອກະສານຕາມແຜນວຽກທີ່ຈະຕ້ອງໄດ້ຢູ່ໃນແຜນງົບປະມານແຫ່ງລັດປະຈຳປີ 2025 ຕ້ອງໃຫ້ວ່ອງໄວ້, ທັນກໍານົດ ແລ້ວສົ່ງໃຫ້ພະແນກແຜນການ-ການເງິນໄດ້ໄປຖອນເງິນມາໄວ້ຄັງ ເພື່ອສະດວກໃນເວລາປະຕິບັດຕົວຈິງ.
ຂ່າວ/ພາບ: ນາງ ທິດດາວອນ ດວງປະເສີດ
ບັນນາທິການ: ປທ ວຽງສະຫວັນ ຈັນທະວີໄຊ