ຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານລົງເກັບກໍາຂໍ້ມູນຕົວຈິງຢູ່ແຂວງໄຊຍະບູລີ

     ໃນຕອນເຊົ້າ ຂອງວັນທີ 25 ມີນາ 2025 ທີມງານຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານ ນໍາໂດຍ ທ່ານ ປທ ນາງ ຄໍາຫຼ້າ ແກ້ວອຸ່ນຄໍາ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໄດ້ເດີນທາງຈາກນະຄອນຫຼວງວຽງຈັນ ໄປແຂວງໄຊຍະບູລີ, ໃນວັນທີ 26 ມີນາ 2025 ທີມງານ ໄດ້ເຂົ້າພົບການນໍາແຂວງໄຊຍະບູລີ ໂດຍທ່ານ ຄໍາຫຼ້າ ແກ້ວອຸ່ນຄໍາ ຄະນະບໍລິຫານງານພັກ, ຮອງຫົວໜ້າ ສມປຊ, ຕາງຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານ ມີຄຳເຫັນລາຍງານຕໍ່ສະຫາຍ ແລະຄະນະ 3 ຈຸດ ຄື: ລາຍງານຈຸດປະສົງ, ແນະນໍາຄະນະລົງເກັບກໍາຂໍ້ມູນ ແລະລາຍງານສະພາບການຄົ້ນຄວ້າແນວຄິດໄກສອນ ແລະບາງຜົນສຳເລັດ.

         ຈຸດປະສົງໃນການມາຄັ້ງນີ້ ແມ່ນເພື່ອມາເກັບກໍາຂໍ້ມູນທີ່ເປັນເອກະສານ, ຮູບພາບ, ວີດີໂອ ທີ່ກ່ຽວ ຂ້ອງກັບປະທານ ໄກສອນ ພົມວິຫານ; ພ້ອມທັງສຳພາດບຸກຄົນ ທີ່ເຄີຍເຮັດວຽກ ແລະຮັບຟັງການໂອ້ລົມ ຂອງປະທານ ໄກສອນ ພົມວິຫານ ເພື່ອປະກອບກະກຽມສ້າງນິພົນຄົບຊຸດ ໄກສອນ ພົມວິຫານ ແລະປະ ກອບໃສ່ເນື້ອໃນບົດວິທະຍາສາດ ຫົວຂໍ້: “ແນວຄິດໄກສອນ ພົມວິຫານ ກ່ຽວກັບວຽກງານກໍ່ສ້າງຮາກຖານການເມືອງ”; ຄະນະຜູ້ແທນ ມານໍາກັນມີ 11 ທ່ານ; ສະພາບການຄົ້ນຄວ້າແນວຄິດໄກສອນ ພົມວິຫານ ແລະບາງຜົນສໍາເລັດ ຄື: ນັບແຕ່ກອງປະຊຸມໃຫຍ່ ຄັ້ງທີ X ຂອງພັກ ໄດ້ຮັບຮອງເອົາແນວຄິດໄກສອນ ພົມວິຫານ ເພີ່ມເຕີມເຂົ້າເປັນພື້ນຖານແນວຄິດ ແລະທິດສະດີຂອງພັກ. ກົມການເມືອງສູນກາງພັກ ກໍໄດ້ອອກມະຕິຕົກລົງ ສະບັບເລກທີ 058/ກມສພ ລົງວັນທີ 13 ທັນວາ 2018 ວ່າດ້ວຍການຄົ້ນຄວ້າແນວຄິດໄກສອນ ພົມວິຫານ ແລະມະຕິຕົກລົງ ສະບັບເລກທີ 063/ກມສພ ລົງວັນທີ 12 ມີນາ 2019 ວ່າດ້ວຍການແຕ່ງຕັ້ງຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານ. ໃນນັ້ນ, ຫົວໜ້າຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານ ແມ່ນປະທານສະພາທິດສະດີສູນກາງພັກ, ມີຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ເປັນຮອງຫົວໜ້າຄະນະ, ຜູ້ປະຈຳການ, ນອກນັ້ນ ຍັງມີບັນດາການນຳທີ່ສັງກັດຢູ່ກະຊວງ, ອົງການຈໍານວນໜຶ່ງ. ບົນພື້ນຖານບັນດາມະຕິດັ່ງກ່າວ ຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິ ຫານ ໄດ້ປະຕິບັດຕາມພາລະບົດບາດຄວາມຮັບຜິດຊອບ, ໂດຍສະເພາະ ແມ່ນໄດ້ລົງຈັດຕັ້ງເຜີຍແຜ່ມະຕິ 058 ແລະ 063 ຂອງກົມການເມືອງສູນກາງພັກ ຢູ່ນະຄອນຫຼວງວຽງຈັນ, ຢູ່ແຂວງສະຫວັນນະເຂດ ແລະ ຢູ່ແຂວງອຸດົມໄຊ. ການເຄື່ອນໄຫວວຽກງານຄົ້ນຄວ້າແນວຄິດໄກສອນ ພົມວິຫານ ໄດ້ມີຜົນສຳເລັດອັນພື້ນຖານຈຳນວນໜຶ່ງ ຄື: ຜ່ານມາໄດ້ຄົ້ນຄວ້າແນວຄິດໄກສອນ ພົມວິຫານ ກ່ຽວກັບຂົງເຂດຕ່າງໆ ທັງໝົດ 24 ຫົວຂໍ້ໃຫຍ່;ໃນນັ້ນ ຄົ້ນຄວ້າສໍາເລັດ ແລະມີຜະລິດຕະພັນພິມເຜີຍແຜ່ແລ້ວຈໍານວນ 8 ຫົວຂໍ້; ສໍາລັບອີກ 9 ຫົວຂໍ້ ແມ່ນໄດ້ສຳເລັດການຂຽນ ແລະເປີດກອງປະຊຸມສຳມະນາເປີດກວ້າງແລ້ວ, ປັດຈຸບັນກໍາລັງຢູ່ໃນຂັ້ນຕອນການປັບປຸງເນື້ອໃນຄືນ;​ ພ້ອມນັ້ນ, ຫົວຂໍ້ທີ່ກໍາລັງຄົ້ນຄວ້າ ຂຽນໃນສົກປີ 2023-2024 ທີ່ຍັງບໍ່ທັນສໍາເລັດ ມີຄື: ຫົວຂໍ້ລະດັບຊາດ 2 ຫົວຂໍ້, ຫົວຂໍ້ລະດັບກະຊວງ-ອົງການ 2 ຫົວຂໍ້; ຫົວຂໍ້ທີ່ກໍາລັງຄົ້ນຄວ້າ ຂຽນໃນສົກປີ 2024-2025 ມີຄື: ຫົວຂໍ້ລະດັບຊາດ 1 ຫົວຂໍ້, ຫົວຂໍ້ລະດັບກະຊວງ-ອົງການ 2 ຫົວຂໍ້. ນອກຈາກນີ້ ກໍໄດ້ສ້າງເນື້ອໃນຫຼັກສູດການຮຽນ-ການສອນ ວິຊາ ແນວຄິດໄກສອນ ພົມວິຫານ ຂັ້ນຕົ້ນ, ຂັ້ນກາງ, ຂັ້ນສູງ, ຫຼັກສູດເຝິກອົບຮົມຄູການເມືອງ 3 ເດືອນ, ຫຼັກສູດປະລິນຍາໂທ ແລະໄດ້ປະກອບວິຊາແນວຄິດໄກສອນ ພົມວິຫານ ເຂົ້າໃນຫຼັກສູດຕ່າງໆ. ສໍາລັບການເຄື່ອນໄຫວເກັບກໍາຂໍ້ມູນໃນໄລຍະຜ່ານມາ ໄດ້ເຄື່ອນໄຫວຮີບໂຮມ, ເກັບກໍາຂໍ້ມູນ, ເອກະສານທີ່ເປັນບົດໂອ້ລົມ, ບົດປະກອບຄຳເຫັນ, ບົດສູນທອນພົດ, ບົດຄວາມ, ບົດກະວີ, ປຶ້ມຂຽນ ແລະວັດຖຸພັນຕ່າງໆ ທີ່ກ່ຽວພັນກັບ ປະທານ ໄກສອນ ພົມວິຫານ ຢູ່ບັນດາສຳນັກງານ, ອົງການຂັ້ນສູນກາງ ແລະການລົງເກັບກໍາຂໍ້ມູນ ຢູ່ທ້ອງຖິ່ນ. ຜ່ານການເຄື່ອນໄຫວດັ່ງ ກ່າວສາມາດຮິບໂຮມ ແລະເກັບກໍາຂໍ້ມູນໄດ້ ຄື: ນິພົນ, ເອກະສານທີ່ຈັດພິມເປັນປຶ້ມ ທີ່ປະທານ ໄກສອນ ພົມວິຫານ ຂຽນ ແລະເອກະສານທີ່ພົວພັນເຖິງ ປະທານ ໄກສອນ ພົມວິຫານ ໄດ້ຈໍານວນ 97 ກວ່າຊະນິດ, ມີປະມານ 507 ກວ່າເຫຼັ້ມ; ເອກະສານຕ່າງໆ ທີ່ເປັນບົດຂຽນ, ບົດໂອລົມ ໄດ້ 1.037 ກວ່າສະບັບ, ມີ 18.550 ກວ່າໜ້າ; ດໍາເນີນການຕີພິມຄືນບັນດາເນື້ອໃນບົດໂອ້ລົມ, ບົດປາໄສ, ບົດຄຳເຫັນ ຂອງປະທານ ໄກສອນ ພົມວິຫານ ເພື່ອກະກຽມໃຫ້ແກ່ການຈັດພິມນິພົນ ຄົບຊຸດ ໄດ້ທັງໝົດ 5.000 ກວ່າໜ້າ. ໃນນັ້ນ ກຳລັງຮີບໂຮມເອກະສານຮ່າງເປັນນິພົນຄົບຊຸດ ສະບັບຕົ້ນ ປີ 1989, 1990, 1991 ແລະ1992 ເພື່ອສ້າງເປັນ 3 ເຫຼັ້ມ ແລະກໍາລັງຢູ່ໃນຂອດບັນນາທິການເນື້ອໃນ 1 ເຫຼັ້ມ ປີ 1983. ສະນັ້ນ, ເພື່ອຕອບສະໜອງຄວາມຮຽກຮ້ອງຕ້ອງການ ໃຫ້ແກ່ການຄົ້ນຄວ້າແນວຄິດໄກສອນ ພົມ ວິຫານ ດ້ານການຄົ້ນຄວ້າຫົວຂໍ້ວິທະຍາສາດ ແລະການສ້າງນິພົນຄົບຊຸດ ໃຫ້ມີເນື້ອໃນຄົບຖ້ວນອຸດົມສົມ ບູນ ແລະຮັບປະກັນລັກສະນະວິທະຍາສາດ, ທາງຄະນະຮັບຜິດຊອບ ແລະນັກວິທະຍາສາດ ຈຶ່ງໄດ້ລົງມາເກັບກຳຂໍ້ມູນໃນຄັ້ງນີ້.

         ພາຍຫຼັງຮັບຟັງຄໍາເຫັນລາຍງານຈາກຕາງໜ້າຄະນະຮັບຜິດຊອບຄົ້ນຄວ້າແນວຄິດໄກສອນ ພົມວິຫານແລ້ວ ກໍໄດ້ມີການເແລກປ່ຽນຄໍາຄິດຄໍາເຫັນ ແລະມີການສໍາພາດບັນດາທ່ານ ຄື: ທ່ານ ນ. ບັນພັກ ອິນທະປັນຍາ ອະດີດກຳມະການ ປະຈຳພັກແຂວງ, ຮອງເຈົ້າແຂວງ; ທ່ານ ຄໍາແກ້ວ ຈັນທະສັກ ອະດີດກຳມະການປະຈຳ ພັກແຂວງ, ຮອງເຈົ້າແຂວງ; ທ່ານ ນໍກີຢ່າ ອະດີດກຳມະການພັກແຂວງ, ຫົວໜ້າ ພະແນກການຄ້າແຂວງ; ທ່ານ ສົມສັກ ລີມທອງ ອະດີດກຳມະການພັກແຂວງ, ເຈົ້າເມືອງແກ່ນທ້າວ; ທ່ານ ນ. ເທວີ ພົນສັກ ອະດີດກຳມະການພັກແຂວງ, ປະທານສະຫະພຸ້ນແມ່ຍິງແຂວງ; ທ່ານ ທອງດີ ທໍ່ ອາດີດເຈົ້້າເມືອງໆພຽງ. ຕໍ່ມາໃນວັນທີ 27 ມີນາ 2025 ໄດ້ສໍາພາດ ທ່ານ ທອງດີ ພັບບົວວອນ ອາດີດກໍາມະການພັກແຂວງ, ເຈົ້າເມືອງໆແກ່ນທ້າວ. ຫຼັງຈາກນັ້ນ, ຄະນະລົງເກັບກໍາຂໍ້ມູນ ຂັ້ນສູນກາງ ແລະຂັ້ນແຂວງ ກໍໄດ້ສະຫຼຸບ ແລະຖອດຖອນບົດຮຽນໃນການລົງເກັບກໍາຂໍ້ມູນໃນຄັ້ງນີ້ ຊຶ່ງເຫັນວ່າໄດ້ຮັບຜົນສໍາເລັດຕາມຈຸດປະສົງ ແລະລະດັບຄາດໝາຍຢ່າງຈົບງາມ.