ໂດຍປະຕິບັດຕາມ ກົດລະບຽບຂອງພັກປະຊາຊົນປະຕິວັດລາວ ສະໄໝທີ X ມາໃນວັນທີ 22 ມັງກອນ 2021 ຢູ່ທີ່ໂຮງຮຽນການເມືອງ ແລະການປົກຄອງແຂວງຊຽງຂວາງ ຈັດພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ, ໃຫ້ກຽດເຂົ້້າຮ່ວມເປັນປະທານພິທີຂອງສະຫາຍ ປທ ນ. ບົວສີ ນາຖາວົງ ຄະນະປະຈໍາພັກແຂວງ, ເລຂາໜ່ວຍພັກ ໂຮງຮຽນການ ເມືອງ ແລະການປົກຄອງ, ມີສະມາຊິກພັກສົມບູນທີ່ເປັນພະນັກງາຄູ-ອາຈານ ແລະນັກສຶກ ຮຸ່ນ ທີ 17 ເຂົ້າຮ່ວມຢ່າງພ້ອມພຽງ.
ໃນພິທີຄັ້ງນີ້ຄະນະຈັດຕັ້ງພິທີໄດ້ຜ່ານມະຕິຕົກລົງ ຂອງຄະນະປະຈຳພັກແຂວງ ວ່າດ້ວຍການອະນຸມັດ ຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງຈຳນວນ 5 ສະຫາຍຄື: ສະຫາຍ ນ. ຄຳຫຼ້າ ໄຊຍະລາດ, ສະຫາຍ ນ. ວຽງພອນ ສີແພງພັນ, ສະຫາຍ ນ. ແສງມະນີ ວັນທະວອນ, ສະຫາຍ ນ. ຫຼ້າໄພວັນ ວິໄລຫານ, ສະຫາຍ ນ. ບັນທະໄລ ໄຊຍະວົງ, ເຊິ່ງທັງ 5 ສະຫາຍ ໄດ້ຜ່ານການທົດສອບໃນວຽກງານຕົວຈິງ ແລະໄດ້ຕັ້ງໜ້າເຝິກຝົນຫຼໍ່ຫຼອມຕົນເອງຈົນກາຍເປັນມະຫາຊົນກ້າວໜ້າ ເຮັດສໍາເລັດທຸກໜ້າທີ່ວຽກງານທີ່ການຈັດຕັ້ງໄດ້ມອບໝາຍໃຫ້ຈົນກາຍເປັນແບບຢ່າງນໍາໜ້າໃນທຸກຂະບວນການຂອງມະຫາຊົນ. ດັ່ງນັ້ນ, ການຈັດຕັ້ງພັກທີ່ກ່ຽວຂ້ອງຈຶ່ງໄດ້ສະເໜີການຈັດຕັ້ງພັກຂັ້ນເທິງ ອອກມະຕິຕົກລົງອະນຸມັດຮັບເອົາມະຫາຊົນກ້າວໜ້າເຂົ້າເປັນສະມາຊິກພັກປະຊາຊົນປະຕິວັດລາວ ເພື່ອເປັນກໍາລັງແຮງໃຫ້ແກ່ພາລະກິດຂອງພັກຕໍ່ໄປ.
ສະຫາຍປະທານໃນພິທີໄດ້ໃຫ້ຄໍາໂອວາດ ຊີ້ທິດເຍືອງທາງໃຫ້ແກ່ສະມາຊິກພັກໃໝ່ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ ແລະສະຫາຍຍັງໄດ້ເນັ້ນໜັກໃຫ້ສະມາຊິກພັກໃໝ່ ຈົ່ງພ້ອມກັນຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ກາຍເປັນສະມາຊິກທີ່ດີເດັ່ນ ຂອງພັກປະຊາຊົນ ປະຕິວັດລາວໃນຕໍ່ໜ້າ.
ໃນຕອນທ້າຍພິທີ ສະຫາຍຜູ້ຕາງໜ້າສະມາຊິກພັກໃໜ່ ຂຶ້ນກ່າວຮັບຄຳໂອວາດຕັກເຕືອນ ແລະໃຫ້ຄຳປະຕິຍານຕໍ່ພັກ ແລະໜ່ວຍພັກ ໂຮງຮຽນການເມືອງ ແລະການປົກຄອງແຂວງ.
ຂ່າວ-ພາບໂດຍ: ທ່ານ ຈັນເພັງ ນັນທະວົງ ຄູ-ອາຈານໂຮງຮຽນການເມືອງ ແລະການປົກຄອງແຂວງຊຽງຂວາງ.
ບັນນາທິການ: ຄອນສະຫວັນ ແສນຍານຸພາບ