ເມື່ອວັນທີ 23 ກໍລະກົດ 2021 ຜ່ານມານີ້ ທີ່ສູນກາງສະຫະພັນກໍາມະບານລາວ ທາງສະຫະພັນກຳມະບານ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ນຳເອົາວັດຖຸປັດໄຈໄປປະກອບສ່ວນ ຊ່ວຍເຫຼືອຜູ້ທີ່ປະສົບໄພນໍ້າຖ້ວມ ຢູ່ແຂວງໄຊຍະບູລີ ມີດັ່ງນີ້:
ໄດ້ມອບວັດຖຸປັດໄຈເປັນຈໍານວນເງິນ 2.000.000 ກີບ (ສອງລ້ານກີບ), ຕາງໜ້າມອບໂດຍທ່ານ ປທ ນ. ວະໄລລັກ ອະໄພ ຫົວໜ້າສູນຂໍ້ມູນຂ່າວສານ ການເມືອງ ແລະ ການປົກຄອງ, ຮອງປະທານ ສະຫະພັນ ກຳມະບານ ສະຖາບັນການເມືອງ ແລະ ການປົກຄອງແຫ່ງຊາດ. ເຊິ່ງຕາງໜ້າຮັບເງິນໃນການຊ່ວຍເຫຼືອຄັ້ງນີ້ແມ່ນ ທ່ານ ວິໄລ ວົງຂະເສີມ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ.
ທ່ານ ປທ ນ. ວະໄລລັກ ອະໄພ ໄດ້ກ່າວຕື່ມອີກວ່າ: ຈໍານວນເງິນທີ່ມອບໃນຄັ້ງນີ້ ເປັນການຮ່ວມຈິດ, ຮ່ວມໃຈ ຂອງສະມາຊິກກຳມະບານ, ພະນັກງານ-ຄູອາຈານ ພາຍໃນ ສມປຊ ແລະເພື່ອເປັນການປະກອບສ່ວນຊ່ວຍເຫຼືອປະເທດຊາດບ້ານເມືອງ ໂດຍສະເພາະພໍ່-ແມ່ປະຊາຊົນ ຜູ້ທີ່ປະສົບໄພນໍ້າຖ້ວມ ທາງແຂວງໄຊຍະບູລີ ແລະທາງສະຫະພັນກໍາມະບານລາວກໍ່ໄດ້ກ່າວຮັບ ແລະກ່າວຄໍາຂອບໃຈມາຍັງສະຫະພັນກໍາມະບານ ສມປຊ ທີ່ມີນໍ້າໃຈ ປະກອບສ່ວນຊຸກຍູ້ຊ່ວຍເຫຼືອປະຊາຊົນ ຜູ້ທີ່ປະສົບໄພນໍ້າຖ້ວມ ແລະເພິ່ນກໍ່ຍັງກ່າວຕື່ມອີກວ່າຈະນໍາເອົາເງິນຈໍານວນດັ່ງກ່າວໄປຊ່ວຍ ເຫຼືອໃຫ້ເກີດຜົນປະໂຫຍດສູງທີ່ສຸດ.
ຂ່າວ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ