ໃນຕອນເຊົ້າຂອງວັນທີ່ 27 ກໍລະກົດ 2022 ທີ່ສະໂມສອນເມືອງສິງ ແຂວງຫຼວງນ້ຳທາ ໄດ້ຈັດພິທີປິດຊຸດຮຽນທິດສະດີການເມືອງ ແລະການປົກຄອງແຂວງ ລະບົບ45 ວັນ, ຮຸ່ນທີ II ໃຫ້ແກ່ພະນັກງານຫຼັກແຫຼ່ງຂົງເຂດສຶກສາທິການ ແລະກິລາ, ໃຫ້ກຽດເປັນປະທານໂດຍ: ປທ ຄຳຟອງ ລາດຊະພົນ ຮອງຫົວໜ້າໂຮງຮຽນການເມືອງ ແລະການປົກຄອງ ແຂວງຫຼວງນ້ຳທາ, ເປັນກຽດເຂົ້າຮ່ວມໂດຍ: ທ່ານ ໜານມອນ ແກ້ວສິງໄຊ ຮອງເລຂາພັກເມືອງ ຜູ້ຊີ້ນຳວຽກພັກ-ພະນັກງານ ເມືອງສິງ, ທ່ານ ສົມຊາຍ ວັດທະນາທອນ ກຳມະການພັກເມືອງ ຫົວໜ້າຫ້ອງການສຶກສາທິການ ແລະກິລາເມືອງສິງ, ມີບັນດາທ່ານແຂກຕາງໜ້າຫ້ອງການອ້ອມຂ້າງເມືອງ, ມີພະນັກງານ, ຄູ-ອາຈານໂຮງຮຽນການເມືອງ ແລະການປົກຄອງແຂວງ ຕະຫລອດຮອດນັກສຶກສາເຂົ້າຮ່ວມຢ່າງພ້ອມພຽງ.
ຫຼັງຈາກນັ້ນ, ທ່ານ ແອທອງ ບຸນຖາວອນ ຮອງຫົວໜ້າຂະແໜງວິຊາການ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນ ໂຮງຮຽນການເມືອງ ແລະການປົກຄອງແຂວງຫຼວງນໍ້າທາ ໄດ້ຈັດຕັ້ງປະຕິບັດໂຄງການຫຼັກສູດການຮຽນ-ການສອນ ທິດສະດີການເມືອງ ແລະການປົກຄອງໂຄງການຫຼັກສູດ 45 ວັນ ຮຸ່ນທີ II ຢູ່ເມືອງສິງ ເລີ່ມແຕ່ວັນທີ 19 ມີຖຸນາ 2022 ເປັນຕົ້ນມາ ໄດ້ສໍາເລັດການຮຽນ-ການສອນໃນວັນທີ 27 ກໍລະກົດ 2022. ສ່ວນເນື້ອໃນບົດຮຽນລວມມີ 05 ພາກວິຊາຮຽນມີ 39 ບົດ, ລວມ 192 ຊົ່ວໂມງ ທີ່ໄດ້ຈັດຕັ້ງປະຕິບັດຕົວຈິງຊຶ່ງມີລາຍລະອຽດດັ່ງນີ້:
| ລ/ດ | ວິຊາຮຽນ | ຈຳນວນບົດ | ຊົ່ວໂມງ | ໜ່ວຍກິດ | ໝາຍເຫດ |
| 01 | ພາກວິຊາ: ປັດຊະຍາມາກ-ເລນິນ | 8 ບົດ | 32 ຊົ່ວໂມງ | 2 | |
| 02 | ພາກວິຊາ: ເສດຖະສາດການເມືອງ | 10 ບົດ | 40 ຊົ່ວໂມງ | 2,5 | |
| 03 | ພາກວິຊາ: ລັດທິສັງຄົມວິທະຍາສາດ | 8 ບົດ | 32 ຊົ່ວໂມງ | 2 | |
| 04 | ພາກວິຊາ: ກໍ່ສ້າງພັກ | 5 ບົດ | 20 ຊົ່ວໂມງ | 1,25 | |
| 05 | ພາກວິຊາ: ບໍລິຫານສາດ ແລະການປົກຄອງ | 8 ບົດ | 68 ຊົ່ວໂມງ | 4,25 | |
| ລວມ | 39 | 192 | 12 |
ໂຮງຮຽນການເມືອງ ແລະການປົກຄອງແຂວງຫຼວງນໍ້າທາແມ່ນໄດ້ນຳໃຊ້ຄູ-ອາຈານ ພາຍໃນຂຶ້ນຫ້ອງສິດສອນ 100%;
ຈາກການຄົ້ນຄວ້າຮ່ຳຮຽນດັ່ງກ່າວ, ພວກເຮົາກໍໄດ້ຈັດຕັ້ງການສອບເສັງແຕ່ລະວິຊາ ເພື່ອປະເມີນຜົນການຮຽນ ແລະວັດແທກຄວາມຮັບຮູ້ ຂອງນັກສຶກສາຊຶ່ງມັນສະແດງອອກດັ່ງນີ້:
+ ຄະແນນ A ດີເລີດ ກວມ 53,75 % ລື່ນຄາດໝາຍຂອງແຜນການ 3,75%;
+ ຄະແນນ B ດີຫຼາຍ ກວມ 35,15% ລື່ນຄາດໝາຍຂອງແຜນການ 5,15%;
+ ຄະແນນ B ດີ ກວມ 11,1 % ຫຼຸດຄາດໝາຍຂອງແຜນການ 3,9%.
+ ຄະແນນ C+ ດີພໍໃຊ້, C ພໍໃຊ້ໄດ້ ແລະ D ອ່ອນ ແມ່ນບໍ່ມີ.
ຄະແນນສອບເສັງແຕ່ລະວິຊາຮຽນ ຂອງນັກສຶກສາສະເລ່ຍແມ່ນ ຢູ່ໃນລະດັບດີຂຶ້ນໄປ. ອັນນີ້ມັນສະແດງໃຫ້ເຫັນວ່ານັກສຶກສາ ທີ່ຮຽນທິດສະດີການເມືອງ ແລະການປົກຄອງ ຮຸ່ນທີ II ມີຄວາມພະຍາຍາມເອົາໃຈໃສ່ ຄົ້ນຄວ້າຮ່ຳຮຽນໄດ້ດີພໍສົມຄວນ.
ນອກຈາກຜົນສຳເລັດທາງດ້ານວິຊາການແລ້ວ ນັກສຶກສາກໍໄດ້ອຸປະຖໍາ: ຄອມພິວເຕີ 1 ຊຸດ ແລະເສື້ອຢຶດໃຫ້ແກ່ໂຮງຮຽນ ລວມມູນຄ່າທັງໜົດ 5.500.000 ກີບ. ເພື່ອຮັບໃຊ້ເຂົ້າໃນການເຄື່ອນໄຫວວຽກງານຕົວຈິງເປັນຕົ້ນແມ່ນວຽກງານການຮຽນ-ການສອນໃຫ້ໄດ້ຮັບປະສິດທິພາບ ແລະປະສິດຜົນສຸງສູດ.
ຂ່າວ/ພາບ: ປອ ວັນນາໄຊ ບຸນຖາວອນ