ໃນຕອນເຊົ້າຂອງວັນທີ 19 ມີຖຸນາ 2023 ທີ່ຫ້ອງປະຊຸມ ຂອງເມືອງສິງ ແຂວງຫຼວງນໍ້າທາ ໄດ້ຈັດພິທີເປີດການເຝິກອົບຮົມທິດສະດີການເມືອງ-ການປົກຄອງລະບົບ 10 ວັນຊຸດທີ IV ໃຫ້ເລຂາພັກບ້ານ, ນາຍບ້ານ ໃນຄັ້ງນີ້ມີນັກເຝິກອົບຮົມ ຈໍານວນທັງໝົດ 30 ທ່ານ, ຍິງ 02 ທ່ານ ຢູ່ເມືອງສິງ ແຂວງຫຼວງນໍ້າທາ ທັງນີ້ກໍເພື່ອເປັນການຈັດຕັ້ງປະຕິບັດຕາມເນື້ອໃນ ຂອງກອງປະຊຸມໃຫຍ່ຂອງພັກໃນແຕ່ລະໄລຍະໃຫ້ປະກົດຜົນເປັນຈິງ. ໃຫ້ກຽດເປັນປະທານໂດຍ: ທ່ານ ປທ ຄຳຟອງ ລາດຊະພົນ ຮອງເລຂາໜ່ວຍພັກ, ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງ. ໃຫ້ກຽດເຂົ້າຮ່ວມໂດຍມີ: ທ່ານ ປອ ຈັນພິພັກ ກອງຈໍາປາ ກຳມະການພັກແຂວງ, ເລຂາພັກເມືອງ, ເຈົ້າເມືອງ ເມືອງສິງ ແຂວງຫຼວງນໍ້າທາ; ພ້ອມດ້ວຍບັນດາທ່ານທີ່ເປັນຄະນະຮັບຜິດຊອບການເຝິກອົບຮົມໃນຄັ້ງນີ້, ມີຕົວແທນມາຈາກ ຫ້ອງວ່າການເມືອງ, ໂຄສະນາອົບຮົມເມືອງ, ຄະນະຈັດຕັ້ງເມືອງ, ອົງການຈັດຕັ້ງມະຫາຊົນ ແລະມາຈາກ ປກສ-ປກຊ ອ້ອມຂ້າງພາຍໃນເມືອງ, ຕະຫຼອດຮອດພະນັກງານ, ຄູ-ອາຈານ ແລະນັກເຝິກອົບຮົມເຂົ້າຮ່ວມຢ່າງພ້ອມພຽງ.
ຫຼັງຈາກນັ້ນ, ທ່ານ ປອ ບຸນຕຽງ ບຸນຫຼ້າແຝງ ຫົວໜ້າຂະແໜງວິຊາການ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນ. ທາງໂຮງຮຽນການເມືອງ ແລະ ການປົກຄອງ ແຂວງຫຼວງນໍ້າທາໄດ້ເລີ່ມຈັດຕັ້ງປະຕິບັດໂຄງການຫຼັກສູດການຮຽນ-ການສອນໃຫ້ນັກເຝິກອົບຮົມທິດສະດີການເມືອງ-ການປົກຄອງໂຄງການຫຼັກສູດ 10 ວັນຊຸດທີ IV ເມືອງສິງເລີ່ມແຕ່ວັນທີ 20ມີຖຸນາ 2023ເປັນຕົ້ນໄປ. ສ່ວນເນື້ອໃນບົດຮຽນລວມມີ 03 ພາກວິຊາຮຽນມີ 19 ບົດ, ມີ 87 ຊົ່ວໂມງເທົ່ກັບ 4,68 ໜ່ວຍກິດ. ພວກເຮົາໄດ້ຈັດຕັ້ງປະຕິບັດຕົວຈິງມີລາຍລະອຽດດັ່ງນີ້:
| ລໍາດັບ | ວິຊາຮຽນ | ຈໍານວນບົດ | ຊົ່ໂມງ |
| 01 | ພາກທີ 1: ທິດທາງລວມ | 4 ບົດ | 18 ຊົ່ວໂມງ |
| 02 | ພາກທີ 2: ວຽກງານພັກ | 7 ບົດ | 25 ຊົ່ວໂມງ |
| 03 | ພາກທີ 3: ວຽກງານບໍລິຫານ ແລະການປົກຄອງ | 8 ບົດ | 32 ຊົ່ວໂມງ |
| ລວມ: | 19 ບົດ | 75 ຊົ່ວໂມງ | |
– ໃນນີ້, ໂຮງຮຽນການເມືອງ ແລະ ການປົກຄອງແຂວງ ໄດ້ນຳໃຊ້ຄູ-ອາຈານພາຍໃນຂຶ້ນຫ້ອງສິດສອນ 100%.
ໃນຕອນທ້າຍ; ທ່ານ ປອ ຈັນພິພັກ ກອງຈໍາປາ ກຳມະການປະຈຳພັກແຂວງ, ເລຂາພັກເມືອງ, ເຈົ້າເມືອງ ເມືອງສິງ ແຂວງຫຼວງນໍ້າທາ; ໄດ້ໃຫ້ກຽດໂອ້ລົມຕໍ່ພິທີເປີດຊຸດຮຽນ ຊຶ່ງທ່ານໄດ້ຮຽກຮ້ອງໃຫ້ນັກເຝິກອົບຮົມຈົ່ງພ້ອມກັນສູ້ຊົນໃຫ້ສຳເລັດຕາມລະດັບຄາດໝາຍ ທີ່ທາງໂຮງຮຽນໄດ້ວາງໄວ້. ການຄົ້ນຄວ້າຮ່ຳຮຽນທິດສະດີການເມືອງ-ການປົກຄອງໃນຄັ້ງນີ້ບັນດານັກເຝິກອົບຮົມຕ້ອງຖືເປັນສຳຄັນ ແລະໝູນໃສ່ເຂົ້າໃນການນໍາພາ-ຊີ້ນໍາວຽກງານຕົວຈິງໃຫ້ແກ່ສະມາຊິກພາຍໃນບ້ານ ຂອງຕົນໃຫ້ມີປະສິດທິຜົນຂຶ້ນໄປເລື້ອຍໆ.
ຂ່າວ/ພາບ: ປທ ນ. ມະນີລາ ແກ້ວລະກຳ ໂຮງຮຽນການເມືອງ ແລະ ການປົກຄອງແຂວງຫຼວງນ້ຳທາ
ບັນນາທິການ: ປທ ບຸນປັນ ສຸມນທອງ