ຊຸດຮຽນທິດສະດິີການເມືອງ ແລະ ການປົກຄອງ ຊັ້ນກາງຮຸ່ນທີ XVIII ເລີ່ມຈັດຕັ້ງປະຕິບັດການຮຽນ-ການສອນ ມາແຕ່ວັນທີ 16 /2/2021 ເປັນຕົ້ນມາ ຮອດວັນທີ 14/6/2023 ສາມາດຈັດຕັ້ງແຜນໂຄງການຫຼັກສູດຮຽນ-ການສອນສໍາເລັດ ລວມເວລາໄລຍະເວລາຈັດຕັ້ງປະຕິບັດທັງໝົດ 16 ເດືອນ (ນັບທັງເວລາພັກພາກຮຽນ 2 ເດືອນ) ຊຸດຮຽນນີ້ ມີນັກສຶກສາທັງໝົດ 65 ສະຫາຍ ຍິງ 17 ສະຫາຍ, ມາຈາກພະແນກການ, ກົມກອງອ້ອມຂ້າງແຂວງ 16 ສະ ຫາຍ, ຍິງ 8 ສະຫາຍ, ມາຈາກບັນດາເມືອງ 21 ສະຫາຍ, ຍິງ 5 ສະຫາຍ ແລະມາຈາກກຳລັງ ປກຊ 18 ສະຫາຍ, ຍິງ 2 ສະຫາຍ, ປກສ ສະຫາຍ, ຍິງ 2 ສະຫາຍ ແລະມາຈາກແຂວງໄຊສົມບູນ 2 ສະຫາຍ; ຈັດຕັ້ງເປັນ 1 ຫ້ອງຮຽນ, ມີຄະນະຈຸພັກ 3 ສະຫາຍ ແລະມີຄະນະຫ້ອງ 5ສະຫາຍ ເພື່ອເຄື່ອນໄຫວນຳພາ-ຊີ້ນຳການຄົ້ນຄວ້າຮ່ຳຮຽນ ຂອງນັກສຶກສາ.
ສະນັ້ນ, ມາໃນວັນທີ 29 ມີຖຸນາ 2023 ຢູ່ທີ່ສະໂມສອນ ໂຮງຮຽນການເມືອງ ແລະ ການປົກຄອງແຂວງຊຽງຂວາງ ໄດ້ຈັດພິທີປິດຊຸດຮຽນດັ່ງກ່າວ ໂດຍການເປັນຄະນະປະທານໂດຍ: ທ່ານ ປທ ນ. ຄຳຫຼ້າ ແກ້ວອຸ່ນຄຳ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ແລະທ່ານ ໜໍບີ ຫາຕົ່ງປາວ ຮອງເລຂາຄະນະບໍລິຫານງານພັກແຂວງ, ຜູ້ຊີ້ນຳວຽກງານການເມືອງ-ແນວຄິດ ແລະວຽກງານພັກພະນັກງານແຂວງຊຽງຂວາງ, ມີຄະນະອຳນວຍການໂຮງຮຽນການເມືອງ ແລະ ການປົກຄອງແຂວງຊຽງຂວາງ ຕະຫຼອດຮອດພະແນກການອ້ອມຂ້າງແຂວງ.
ທ່ານ ປທ ບຸນຊູ ອິດທິພົນ ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງ ໄດ້ຜ່ານບົດສະຫຼຸບຕໍ່ຊູດຮຽນວ່າ: ການຮຽນ-ການສອນຕໍ່ຊຸດຮຽນທິດສະດິີການເມືອງ ແລະ ການປົກຄອງຊັ້ນກາງແມ່ນໄດ້ເນັ້ນໃສ່ການສິດສອນແບບຕັ້ງໜ້າປະສົມປະສານກັບວິທີແບບບັນລະບາຍໂດຍເນັ້ນໃສ່ການຄົ້ນຄວ້າຂອງນັກສຶກສາເປັນໃຈກາງ ແລະການປະເມີນຜົນຂອງນັກສຶກສາດ້ວຍຫຼາຍວິທີຂຽນບົດລາຍງານ, ສອບເສັງຂຽນ, ສອບເສັງລະດັບ ສມປຊ; ມີການປະເມີນການຮຽນ-ການສອນ ຂອງຄູ-ອາຈານ ແລະນັກສຶກສາປະຈໍາແຕ່ລະພາກຮຽນຂອງທຸກໆລະບົບຮຽນໂດຍແມ່ນນັກສຶກສາເປັນຜູ້ລົງຄະແນນຕີລາຄາ ແລະເປີດກອງປະຊຸມສະພາຄູສະຫຼຸບຖອດຖອນບົດຮຽນ.
ນອກນັ້ນ, ທ່ານຍັງໃຫ້ຮູ້ຕື່ມວ່າ: ຜົນການຮຽນຂອງນັກສຶກສາຕະຫຼອດຊຸດຮຽນໃນຈຳນວນ 28ວິຊາ ທີ່ຮຽນທັງໝົດບວກກັບຄະແນນປ້ອງກັນບົດຈົບຊັ້ນສາມາດສະຫຼຸບໄດ້ຄື: ນັກສຶກສາຮຽນເກັ່ງທີ່ໄດ້ຄະແນນເກຣດ A (ປະເພດດີເລີດ) ຕະຫຼອດຊຸດຮຽນນີ້ມີ 1ສະຫາຍ, ຍິງ 0ສະຫາຍ ກວມ1,5%ຖ້າທຽບໃສ່ຊຸດຮຽນຜ່ານມາແມ່ນມີຈຳນວນຫຼຸດລົງຂອງຈຳນວນນັກສຶກສາຮຽນເກັ່ງປະເພດດີເລີດໃນຕະຫຼອດຊຸດຮຽນ (ຄະແນນເກຼດ A) ນັກສຶກສາທີ່ໄດ້ຄະແນນເກຣດ B+ (ດີຫຼາຍ) ມີ 64 ສະຫາຍ, ຍິງ 17 ສະຫາຍ ກວມ 98,5 % ທຽບໃສ່ຊຸດຮຽນຜ່ານມາແມ່ນດີຂຶ້ນ, ສ່ວນຄະແນນເກຼດ B ຫາ ເກຣດ F ບໍ່ມີ ແລະຜົນຂອງການຂຽນບົດປ້ອງກັນບົດຈົບຊັ້ນມີດັ່ງນີ້: ນັກສຶກສາທີ່ໄດ້ຄະແນນເກຼດ A (ດີເລີດ) ມີ 48 ສະຫາຍ ກວມ 73,85 % ຂອງຈໍານວນນັກສຶກສາທັງໝົດ, ນັກສຶກສາທີ່ໄດ້ຄະແນນເກຼດB+ (ດີຫຼາຍ) ມີ 17ສະຫາຍ ກວມ26,15 % ຂອງຈໍານວນນັກສຶກສາທັງໝົດ ແລະສ່ວນຄະແນນເກຼດ B ຫາເກຼດ F ບໍ່ມີ ສິ່ງດັ່ງກ່າວນັ້ນໄດ້ຢັ້ງຢືນໃຫ້ເຫັນວ່າ: ນັກສຶກສາມີຄວາມຮັບຜິດຊອບສູງຕໍ່ການສຶກສາຄົ້ນຄວ້າທິດສະດີ ຈຶ່ງເຮັດໃຫ້ຄະແນນຕະຫຼອດຊຸດຮຽນອອກມາດີ ແລະເພື່ອເປັນການຢັ້ງຢຶນເຖິງຜົນສໍາເລັດ ດັ່ງນັ້ນ, ໂຮງຮຽນການເມືອງ ແລະ ການປົກຄອງແຂວງຊຽງຂວາງ ຈຶ່ງໄດ້ຈັດພິທີມອບໃບປະກາສະນີຍະບັດການຮຽນທິດສະດີການເມືອງ ແລະການປົກ ຄອງໃຫ້ແກ່ນັກສຶກສາຢ່າງສົມກຽດ.
ທ່ານ ປທ ນ. ຄຳຫຼ້າ ແກ້ວອຸ່ນຄຳ ໄດ້ໂອ້ລົມ ແລະໃຫ້ທິດຊີ້ນຳຕໍ່ກັບນັກສຶກສາດັ່ງກ່າວວ່າ: ໃນປະຈຸບັນພວກເຮົາກໍາລັງຕັ້ງໜ້າຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຂອງອົງຄະນະພັກແຂວງຂອງພວກສະຫາຍ ເຂົ້າສູ່ຊີວິດຕົວຈິງ. ຄວາມຮູ້ທີ່ພວກສະຫາຍໄດ້ຮຽນ ແມ່ນຄວາມຮູ້ທາງທິດສະດີ, ເປັນເຂັມທິດອັນໜຶ່ງທີ່ສຳຄັນເພື່ອເຍືອງທາງໃຫ້ແກ່ການເຄື່ອນໄຫວຂອງພວກສະຫາຍໃນຕໍ່ໜ້າ.
ແຕ່ອັນສຳຄັນກວ່າໝູ່ນັ້ນ ແມ່ນພວກສະຫາຍຕ້ອງຮູ້ໝູນໃຊ້ສິ່ງທີ່ໄດ້ຮຽນຮູ້ມາຢ່າງປະດິດສ້າງ ເຂົ້າໃນວຽກງານຕົວຈິງ ຈຶ່ງຈະກໍ່ໃຫ້ເກີດຜົນປະໂຫຍດໃຫ້ແກ່ການສ້າງສາພັດທະນາປະເທດຊາດຂອງພວກເຮົາຢ່າງບໍ່ຢຸດຢັ້ງ. ຍ້ອນແນວນັ້ນ, ມັນຈິ່ງຮຽກຮ້ອງໃຫ້ບັນດາສະຫາຍ ຕ້ອງກຳແໜ້ນວິທີວິທະຍາປະຕິວັດ ແລະວິທະຍາສາດຂອງລັດທິມາກ-ເລນິນທີ່ໄດ້ຮຽນມາແລ້ວ; ແນວຄິດປະທານ ໄກສອນ ພົມວິຫານ, ກຳແໜ້ນ ສະພາບຄວາມເປັນຈິງຂອງກົມກອງທ້ອງຖິ່ນຕົນຜ່ານການປຶກສາຫາລືກັບໝູ່ຄະນະກ່ຽວກັບວິທີການ, ຮູບການນຳໃຊ້ບົດຮຽນ ທີ່ຕົນໄດ້ຮຽນມາເຂົ້າໃສ່ວຽກງານຕົວຈິງ ເພື່ອໃຫ້ສອດຄ່ອງ.
– ທິດສະດີ, ແນວທາງທີ່ພວກສະຫາຍຮຽນມາ ຕ້ອງໄດ້ຮັບການທົດສອບ, ກວດສອບ ແລະຢືນຢັນຈາກພຶດຕິກຳຕົວຈິງ. ຍ້ອນແນວນັ້ນ, ບັນດາສະຫາຍຈົ່ງນຳເອົາບົດຮຽນທີ່ໄດ້ຮຽນມາ ໄປທົດ ສອບ ຢູ່ໃນພຶດຕິກຳປະຕິວັດແຫ່ງການສ້າງສາພັດທະນາໜ້າວຽກ ຂອງບັນດາສະຫາຍ ກໍຄືພັດທະນາປະເທດຊາດອັນນີ້ຈະຊ່ວຍໃຫ້ພວກເຮົາເຫັນແຈ້ງວ່າອັນໃດຖືກ, ອັນໃດຜິດ, ອັນໃດສອດຄ່ອງເໝາະ ສົມ ຫຼື ບໍ່ສອດຄ່ອງບົນພື້ນຖານເດັດດ່ຽວປົກປ້ອງສິ່ງທີ່ຖືກຕ້ອງ ພ້ອມກັນນັ້ນກໍ່ຕັດສິນໃຈ ດັດແປງແກ້ໄຂອັນທີ່ບໍ່ຖືກຕ້ອງຢ່າງທັນການ.
ສະນັ້ນ, ຜົນສຳເລັດ ແລະປາກາສະນິຍະບັດ ທີ່ພວກເຮົາ ໄດ້ຮັບໃນມື້ນີ້ ເປັນຜົນສຳເລັດເບື້ອງຕົ້ນເທົ່ານັ້ນ, ຜົນສຳເລັດ ທີ່ຢັ້ງຢືນ ຄວາມຮູ້ຄວາມສາມາດ ທີ່ໄດ້ຮຽນມາ ແມ່ນການທີ່ພວກສະຫາຍ ໄດ້ນຳພາ-ຄຸ້ມຄອງປະຊາຊົນບັນດາເຜົ່າຫ້າວຫັນເປັນເຈົ້າຕົນເອງທຳມາຫາກິນ, ສາມາດປົວແປງຊີວິດການເປັນຢູ່, ສ້າງສາພັດທະນາເສດຖະກິດ-ສັງຄົມຂອງທ້ອງຖິ່ນ ຈະເລີນກ້າວໜ້າ…
ຂ່າວ: ຕາອັອດ ແສນທະວີສຸກ
ຮູບພາບ: ໂຮງຮຽນການເມືອງ ແລະ ການປົກຄອງແຂວງຊຽງຂວາງ
ບັນນາທິການ: ປທ ບຸນປັນ ສຸມຸນທອງ