ກຳມະບານຮາກຖານ ສູນຂໍ້ມູນຂ່າວສານການເມືອງ ແລະ ການປົກຄອງ-ສູນຄົ້ນຄວ້າແນວຄິດ ໄກສອນ ພົມວິຫານ ທັດສະນະສຶກສາ ອະນຸສອນສະຖານ  ປະທານ ສຸພານຸວົງ

ການນຳພັກ-ລັດ, ບັນດາສຳນັກງານ, ອົງການອ້ອມຂ້າງໃນນະຄອນຫຼວງວຽງຈັນ ທີ່ຜ່ານມາໄດ້ວາງກະຕ່າດອກໄມ້ເນື່ອງໃນໂອກາດວັນຄ້າຍວັນເກີດ ທີ່ໄດ້ໝູນວຽນມາເຖິງອີກວາລະໜຶ່ງຄົບຮອບ 114 ປີ (13.7.1909-13.7. 2023) ຜູ້ນໍາທີ່ດີເດັ່ນ ແລະເຄົາລົບຮັກຂອງປະຊາຊົນລາວບັນດາເຜົ່າ, ສະນັ້ນ, ກຳມະບານຮາກຖານ ຂອງສູນຂໍ້ມູນຂ່າວສານການເມືອງ ແລະ ການປົກຄອງ-ສູນຄົ້ນຄວ້າແນວຄິດ ໄກສອນ ພົມວິຫານ ຈຶ່ງໄດ້ເປັນສ່ວນໜຶ່ງໃນການທັດສະນະສຶກສາອະນຸສອນສະຖານ ປະທານ ສຸພານຸວົງ ໃນຕອນເຊົ້າຂອງວັນທີ 9 ສິງຫາ 2023 ໂດຍການນຳພາຂອງສະຫາຍ ນ. ອໍາພອນ ບຸນລືໄຕ ປະທານກໍາມະບານ ຮາກຖານ ສູນຂໍ້ມູນຂ່າວສານການເມືອງ ແລະ ການປົກຄອງ-ສູນຄົ້ນຄວ້າແນວຄິດ ໄກສອນ ພົມວິຫານ.

         ການທັດສະນະສຶກສາຄັ້ງນີ້, ກຳມະບານຮາກຖານ ສູນຂໍ້ມູນຂ່າວສານການເມືອງ ແລະ ການປົກຄອງ-ສູນຄົ້ນຄວ້າແນວຄິດ ໄກສອນ ພົມວິຫານ ໄດ້ວາງກະຕ່າດອກໄມ້ ເພື່ອສະແດງຄວາມຮູ້ບຸນຄຸນ ຂອງປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ເປັນຜູ້ນໍາທີ່ສະຫຼາດສ່ອງໃສ ຍາມໃດກໍ່ເອົາຄວາມສຸກ ແລະປະໂຫຍດສ່ວນລວມຫຼາຍກວ່າສ່ວນຕົວ ຍອມເສຍສະຫຼະຄວາມສຸກ, ຄວາມສະບາຍເພື່ອສະແຫວງຫາເສັ້ນທາງ ອັນສະຫວ່າງສ່ອງໃສ ນຳພາປະເທດຊາດໃຫ້ຮຸ່ງເຮືອງສີວິໄລ.

         ເປັນກຽດບັນລະຍາຍ ແລະນຳພາໂດຍ ທ່ານ ນ. ພັນລານີ ພິມມະເສນ ວິຊາການນຳທ່ຽວ ອະນຸສອນສະຖານ ຊຶ່ງທ່ານໄດ້ໃຫ້ຮູ້ວ່າ: ປະທານ ສຸພານຸວົງ ເປັນກະສັດ, ເປັນວິລະບູລຸດ ທີ່ມີແບບແຜນການດຳລົງຊີວິດທີ່ລຽບງ່າຍ, ປະຍັດມັດທະຍັດ ແລະມີສິນທຳປະຕິວັດອັນສູງສົ່ງ ທ່ານໄດ້ສຸມໃສ່ທຸກກຳລັງເຮື່ອແຮງ ແລະສະຕິປັນຍາເຂົ້າໃນຂະບວນການຕໍ່ສູ້ປົດປ່ອຍປະເທດຊາດ ຄຽງບ່າຄຽງໄລ່ກັບປະຊາຊົນບັນດາເຜົ່າ ຕີຕ້ານສັດຕູຜູ້ຮຸກຮານ ອັນໄດ້ເຮັດໃຫ້ປະເທດຊາດໄດ້ຮັບການປົດປ່ອຍ ແລະສ້າງສາພັດທະນາປະເທດລາວ ໃຫ້ຈະເລີນສີວິໄລເປັນກ້າວໆ.

         ທຸກໆໄລຍະແຫ່ງການປະຕິວັດ ປະທານ ສຸພານຸວົງ ໄດ້ສຸມສະຕິປັນຍາ ແລະເຫື່ອແຮງຂອງຕົນເພື່ອນຳພາ-ຊີ້ນຳ ຂະບວນການປະຕິວັດລາວ ຈົນສາມາດຍາດເອົາໄຊຊະນະອັນຍິ່ງໃຫຍ່ມາໃຫ້ແກ່ປະເທດຊາດ. ປະທານ ໄກສອນ ພົມວິຫານ ໄດ້ເວົ້າເຖິງ ປະທານ ສຸພານຸວົງ ວ່າ: “ຊື່ສຽງຮຽງນາມ ຂອງ ສະຫາຍ ໄດ້ພົ້ນເດັ່ນຂຶ້ນໃນຖານະທີ່ເປັນນັກຮົບຮັກຊາດຮຸ່ນທຳອິດທີ່ໄດ້ເອົາຊີວິດຂອງຕົນຜູກພັນກັບການປະຕິວັດຕະຫຼອດມາໂດຍບໍ່ງໍ້ງ່ຽງ ຕໍ່ຄວາມລຳບາກ, ມີຄວາມເສຍສະລະ ທັງບໍ່ຫວາດຫວັ່ນຕໍ່ກັບການຈັບກຸມຄຸມຂັງຂອງສັດຕູ ຍາມໃດກໍ່ຕໍ່ສູ້ເພື່ອອຸດົມຄະຕິປະຕິວັດອັນສູງສົ່ງ, ເພື່ອຄວາມເປັນເອກະລາດ ແລະຄວາມວັດທະນາຖາວອນຂອງປະເທດຊາດ ເພື່ອອິດສະຫຼະພາບ ແລະຄວາມຢູ່ດີກິນດີຂອງປະຊາຊົນບັນດາເຜົ່າ”.

ໂອກາດດັ່ງກ່າວ ສະຫາຍ ຄອນສະຫວັນ ແສນຍານຸພາບ ຄະນະກຳມະບານຮາກຖານ ໄດ້ຕາງໜ້າໃຫ້ຄະນະສະແດງຄວາມຮູ້ສຶກ ແລະກ່າວປະຕິຍານວ່າ: ຈະສືບທອດພາລະກິດອັນລ້ຳຄ່າ, ຄຸນງາມຄວາມດີຕະຫຼອດຮອດແບບແຜນການດຳລົງຊີວິດ ແລະພຶດຕິກຳຕົວຈິງຂອງ ປະທານ ສຸພານຸວົງ  ໃຫ້ຖັນແຖວຂອງສະມາຊິກກຳມະບານໄດ້ເຊື່ອມຊຶມຢ່າງເລິກເຊິ່ງຕໍ່ກັບການເຄື່ອນໄຫວ ຂອງປະທານ ສຸພານຸວົງ  ແລະຈະປະຕິບັດຕາມເສັ້ນທາງເດີນຂອງທ່ານວາງໄວ້.

ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ