ວາລະສານເອເລັກໂຕຣນິກ “ການຕ່າງປະເທດ”ຂອງກະຊວງການຕ່າງປະເທດ, ເຊິ່ງວາລະສານນີ້ແມ່ນຮັບຜິດຊອບການສ້າງໂດຍ: ກົມການຂ່າວ ຂອງກະຊວງການຕ່າງປະເທດ ໂດຍປະຕິບັດຕາມພາລະບົດບາດ ແລະຕາມທິດຊີ້ນຳຢ່າງໃກ້ຊິດຕິດແທດ ຂອງຄະນະນຳກະຊວງການຕ່າງປະເທດ, ຖືເປັນໜຶ່ງບາດກ້າວສຳຄັນຂອງການປະກອບສ່ວນພັດທະນາວຽກງານໂຄສະນາເຜີຍແຜ່ຂໍ້ມູນຂ່າວສານ ແລະໝາກຜົນຂອງການເຄື່ອນໄຫວວຽກງານການຕ່າງປະເທດ ຂອງ ສປປ ລາວ ໃນຍຸກສະໄໝໃໝ່ທີ່ຖືກຕ້ອງ ແລະສອດຄ່ອງກັບສະພາບການຂອງໂລກໃນປັດຈຸບັນ ທີ່ກຳລັງມີການນໍາໃຊ້ເຕັກໂນໂລຊີທາງດ້ານຂໍ້ມູນຂ່າວສານ ດ້ວຍຫຼາຍຮູບການ, ເຊິ່ງມັນໄດ້ຮຽກຮ້ອງໃຫ້ການນຳສະເໜີຂໍ້ມູນຂ່າວສານຍິ່ງຕ້ອງມີຄວາມວ່ອງໄວ, ທັນສະໄໝ, ມີປະສິດທິພາບ ແລະປະສິດທິຜົນສູງ.
ສະນັ້ນ, ສູນຂໍ້ມູນຂ່າວສານການເມືອງ ແລະ ການປົກຄອງ ຈຶ່ງເຫັນໄດ້ຄວາມສຳຄັນ ແລະທິດທາງແຜນການຕໍ່ໜ້າໃນການສ້າງວາລະສານເອເລັກໂຕຣນິກ ຈຶ່ງໄດ້ນຳພາພະແນກວາລະສານ ພ້ອມດ້ວຍຕາງໜ້າພະນັກງານ, ຄູ-ອາຈານໄປແລກປ່ຽນບົດຮຽນກັບວາລະສານ ເອເລັກໂຕນິກ “ການຕ່າງປະເທດ” ກົມການຂ່າວ, ກະຊວງການຕ່າງປະເທດ ໃນຕອນເຊົ້າຂອງວັນທີ 11 ສິງຫາ 2023. ການໄປແລກປ່ຽນບົດຮຽນການສ້າງວາລະສານເອເລັກໂຕຣນິກຄັ້ງນີ້ນຳພາ ໂດຍ: ທ່ານ ປທ ນ. ວະໄລລັກ ອະໄພ ຫົວໜ້າສູນຂໍ້ມູນຂ່າວສານການເມືອງ ແລະ ການປົກຄອງ ແລະໃຫ້ກຽດຕ້ອນຮັບໂດຍ: ທ່ານ ພອນທະວີ ບຸດດາລາ ຫົວໜ້າກົມການຂ່າວ ພ້ອມດ້ວຍຄະນະພະແນກ.
ໃນວາລະຂອງການແລກປ່ຽນຄັ້ງນີ້, ທ່ານ ພອນທະວີ ບຸດດາລາ ໄດ້ຍົກໃຫ້ເຫັນວ່າ: ເນື້ອໃນຫຼັກ ຂອງວຽກງານວາລະສານຈະຕ້ອງໄດ້ສັງລວມເອົາບັນດາເນື້ອໃນ, ຮູບພາບ ແລະໝາກຜົນການເຄື່ອນໄຫວການຕ່າງປະເທດຂອງບັນດາຜູ້ນຳພັກ-ລັດ ສປປ ລາວ ແລະພາກສ່ວນຕ່າງໆ ຢູ່ໃນເວທີພາກພື້ນ ແລະສາກົນອອກເຜີຍແຜ່ສູ່ສັງຄົມໃນຮູບແບບລາຍເດືອນ ໂດຍຜ່ານຫຼາຍຊ່ອງທາງຂອງສື່ອອນລາຍປະເພດຕ່າງໆ ເຊິ່ງຈະເຮັດໃຫ້ຜູ້ທີ່ມີຄວາມສົນໃຈທັງຢູ່ພາຍໃນ ແລະ ຕ່າງປະເທດໄດ້ຮັບຮູ້ຂໍ້ມູນຂ່າວສານທີ່ເປັນປະໂຫຍດ, ມີເນື້ອໃນຄົບຖ້ວນ, ຖືກຕ້ອງ ແລະທັນກັບສະຖານະການ.
ນອກນັ້ນ, ໃນຄະນະຂອງກົມການຂ່າວ, ໄດ້ນຳສະເໜີບົດຮຽນຂອງຂັ້ນຕອນການເກັບກຳຂໍ້ມູນ, ການນຳໃຊ້ເຕັກນິກດ້ານໂປຼແກຣມຮັບໃຊ້ວຽກງານວາລະສານຕະຫຼອດຮອດການເຜີຍແຜ່ລົງເວັບໄຊhttp://www.mofa.gov.la ຂອງກະຊວງການຕ່າງປະເທດ ເພື່ອເປັນຊ່ອງທາງສະດວກການເຂົ້າເຖິງຂໍ້ມູນຂ່າວສານ.
ທ່ານ ປທ ນ. ວະໄລລັກ ອະໄພ ຫຼັງຈາກໄດ້ຮັບຮູ້ເຖິງຂໍ້ມູນ, ບົດຮຽນຂອງການສ້າງວາລະສານເອເລັກໂຕຣນິກ “ການຕ່າງປະເທດ” ທ່ານໄດ້ມີຄວາມສົນໃຈ, ຕັ້ງຄຳຖາມແລກປ່ຽນເຊິ່ງກັນ ແລະກັນ ໂດຍສະເພາະດ້ານກົງຈັກການຈັດຕັ້ງ ແລະນິຕິກຳຕ່າງໆໃນການຄຸ້ມຄອງຂອງການສ້າງວາລະສານ ຕະຫຼອດຮອດສະພາບການເຄື່ອນໄຫວຈັດຕັ້ງປະຕິບັດວຽກງານໃນໄລຍະຜ່ານມາ ເຊິ່ງມີອັນພົ້ນເດັ່ນ, ຂໍ້ສະດວກ, ຂໍ້ຫຍຸ້ງຍາກ, ດ້ານຄົງຄ້າງ ແລະວິທີການແກ້ໄຂ; ຮູບແບບ ແລະວິທີການຈັດຕັ້ງອົບຮົມ, ບັນດາເນື້ອໃນເອກະສານທີ່ນໍາໃຊ້ການເຝິກອົບຮົມໃຫ້ພະນັກງານຜູ້ສືບທອດ ແລະປ່ຽນແທນ.
ການແລກປ່ຽນບົດຮຽນຂອງທັງສອງຝ່າຍໃນຄັ້ງນີ້ ແມ່ນເປັນປະໂຫຍດຫຼາຍຕໍ່ບົດຮຽນຂອງການສ້າງວາລະສານ ເອເລັກໂຕຣນິກ ເພື່ອເປັນພື້ນຖານ ແລະທິດທາງໃນຕໍ່ໜ້າຂອງວຽກງານວາລະສານ ທິດສະດີການເມືອງ-ການປົກຄອງ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ