ການຈັດຕັ້ງປະຕິບັດການຮຽນ-ການສອນ ລະບົບທິດສະດີການເມືອງຂັ້ນສູງ 9 ເດືອນ ຮຸ່ນທີ I ໃນສົກຮຽນ 2022-2023 ຢູ່ສະຖາບັນການເມືອງ ແລະ ການປົກຄອງແຫ່ງຊາດ ໄດ້ເລີ່ມຕົ້ນຂຶ້ນໃນໄລຍະກາງເດືອນກັນຍາປີ 2022 ທີ່ຜ່ານມາ, ເປັນຮຸ່ນບຸກເບີກຂອງການຈັດຕັ້ງປະຕິບັດຫຼັກສູດ.
ເພື່ອເປັນການສະຫຼຸບຊຸດຮຽນດັ່ງກ່າວ, ສມປຊ ໄດ້ຈັດພິທີປິດ ແລະມອບໃບຢັ້ງຢືນທິດສະດີການເມືອງຂັ້ນສູງ 9 ເດືອນ ຮຸ່ນທີ I ຂຶ້ນໃນຕອນເຊົ້າຂອງວັນທີ 21 ສິງຫາ 2023 ທີ່ສະໂມສອນ ສມປຊ, ໂດຍການເປັນປະທານຂອງທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ, ມີຕາງໜ້າຫ້ອງການ, ກົມ, ຄະນະຕ່າງໆ, ສູນຕ່າງໆ, ນັກສຶກສາ ທິດສະດີການເມືອງຂັ້ນສູງ ຮຸ່ນທີ II-III ແລະ ນັກສຶກສາທິດສະດີການເມືອງຂັ້ນກາງ 6 ເດືອນ ຮຸ່ນທີ I ຕະຫຼອດຮອດພະນັກງານ, ຄູ-ອາຈານ.
ທ່ານ ປອ ນ. ໄກສອນ ຈັນສີນາ ຄະນະບໍລິຫານງານພັກ, ຫົວໜ້າກົມຄຸ້ມຄອງການຮຽນ-ການສອນໄດ້ຜ່ານບົດສະຫຼຸບວ່າ: ການຈັດຕັ້ງການຮຽນ-ການສອນຂອງຊຸດບຳລຸງ-ກໍ່ສ້າງພະນັກງານນຳພາ-ຄຸ້ມຄອງ, ພະນັກງານຫຼັກແຫຼ່ງ ຂອງພັກ-ລັດ ແລະອົງການຈັດຕັ້ງພັກ ແລະມະຫາຊົນໃນຂອບເຂດທົ່ວປະເທດ ໃນຊຸດນີ້ ສະຖາບັນໄດ້ສຸມໃສ່ເຮັດລ້ອນໜ້າທີ່ການເມືອງທີ່ໄດ້ຮັບມອບໝາຍໃນການຂຶ້ນຫ້ອງສິດສອນ ແລະນັກສຶກສາໄດ້ຄົ້ນຄວ້າຮ່ຳຮຽນ ເຝິກຝົນຫຼໍ່ຫຼອມຕົນເອງໃນດ້ານທິດສະດີມາກ-ເລນິນ, ແນວຄິດ ໄກສອນ ພົມວິຫານ ແລະທິດສະດີທີ່ກ້າວໜ້າຕ່າງໆ ດ້ວຍຄວາມມານະອົດທົນ, ປະຕິບັດບັນດາຄໍາສັ່ງ, ຂໍ້ກໍານົດກ່ຽວກັບລະບຽບນັກສຶກສາຂອງສະຖາບັນແຫ່ງນີ້ໄດ້ດີ.
ນອກນັ້ນ, ທ່ານຍັງໄດ້ໃຫ້ຮູ້ວ່າ: ນັກສຶກສາຮຸ່ນດັ່ງກ່າວ, ແມ່ນມາຈາກບັນດາກະຊວງ ແລະອົງການອ້ອມຂ້າງສູນກາງ 23 ສະຫາຍ, ຍິງ 5 ສະຫາຍ, ມາຈາກທ້ອງຖິ່ນ 37 ສະຫາຍ, ຍິງ 7 ສະຫາຍ, ມາຈາກກຳລັງປ້ອງກັນຊາດ 1 ສະຫາຍ ແລະ ປ້ອງກັນຄວາມສະຫງົບ 1 ສະຫາຍ. ລະດັບວິຊາສະເພາະ ນັບແຕ່ຊັ້ນສູງເຖິງປະລິນຍາເອກ; ໃນລະບົບຮຽນນີ້ໄດ້ມີການຈັດຕັ້ງການຮຽນທັງໝົດ 23 ວິຊາ ຫຼື 1.113 ຊົ່ວໂມງ, ລວມທັງປ້ອງກັນບົດຈົບຂັ້ນ ແລະຫ້ອງຮຽນດັ່ງກ່າວໄດ້ຈັດເປັນ 3 ຂົງເຂດວຽກງານຂຽນບົດປ້ອງກັນຈົບຂັ້ນຄື:
+ ຂົງເຂດວຽກງານການເມືອງ ມີ 34 ທ່ານ, ຍິງ 08 ທ່ານ;
+ ຂົງເຂດວຽກງານການປົກຄອງມີ 12 ທ່ານ, ຍິງ 03 ທ່ານ;
+ ຂົງເຂດວຽກງານຄຸ້ມຄອງເສດຖະກິດ ມີ 14 ທ່ານ, ຍິງ, 01 ທ່ານ.
ຜົນງານການຮ່ຳຮຽນຂອງນັກສຶກສາຕະຫຼອດໄລຍະ 9 ເດືອນ ສາມາດຕີລາຄາຜົນສຳເລັດຂອງຊຸດຮຽນຄັ້ງນີ້ຄື:
ນັກສຶກສາລະບົບຂັ້ນສູງ 9 ເດືອນ ຮຸ່ນທີ I: ຈຳນວນ 60 ທ່ານ, ຍິງ 12 ທ່ານ ໄດ້ຮັບຄະແນນສະສົມ ເກຼດ A ຫຼື ດີເລີດ ມີ 34 ທ່ານ, ກວມ 56,67% ຂອງຈໍານວນນັກສຶກສາໃນຫ້ອງຮຽນ; ໄດ້ຮັບຄະແນນສະສົມ ເກຼດ B+ = 26 ທ່ານ ຫຼື 43,33% ຂອງຈໍານວນນັກສຶກສາໃນຫ້ອງຮຽນ.
ໃນພິທີໄດ້ຖືວາລະໂອກາດສຳຄັນ ກ່າວເປີດຊຸດຮຽນທິດສະດີການເມືອງຂັ້ນກາງ 6 ເດືອນ ຮຸ່ນທີ I ຊຶ່ງມີຜູ້ເຂົ້າຮຽນທັງໝົດ 60 ທ່ານ, ຍິງ 25 ທ່ານ, ຊຶ່ງໃນຫຼັກສູດນີ້ ຈະໄດ້ຮຽນ 7 ກຸ່ມວິຊາຮຽນ ແລະຂຽນບົດຈົບຂັ້ນ ລວມຮຽນທັງໝົດ 720 ຊົ່ວໂມງ ຫຼື 94 ບົດ. ໃນນັ້ນ ຈະປະກອບມີ ຟັງລາຍງານເພີ່ມ, ຄົ້ນຄວ້າ, ສໍາມະນາ, ແກ້ຂໍ້ຂ້ອງໃຈ ແລະຂຽນບົດລາຍງານແຕ່ລະວິຊາ.
ທ່ານ ປທ ນ. ພອນໄຊ ລາດຊະວົງ ຫົວໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ຕົກລົງວ່າດ້ວຍການມອບໃບຍ້ອງຍໍຕໍ່ຜູ້ທີ່ຮຽນເກັ່ງ-ມີວິໄນດີ ມີຄະແນນສະເລ່ຍ 3,90 ຂຶ້ນໄປ ຖືກຈັດເປັນປະເພດທີ I ມີ 30 ທ່ານ, ຍິງ 9 ທ່ານ ຫຼື ກວມເອົາ 50% ຂອງນັກສຶກສາໃນຫ້ອງຮຽນ;
– ນັກຮຽນເກັ່ງ ມີວິໄນດີ ຄະແນນສະເລ່ຍ 3,78 ຂຶ້ນໄປ ຖືກຈັດເປັນປະເພດທີ II ມີ 30 ທ່ານ, ຍິງ 3 ທ່ານ ຫຼື ກວມເອົາ 50% ຂອງນັກສຶກສາໃນຫ້ອງຮຽນ;
– ຄັດເລືອກຄະນະພັກ, ຄະນະຫ້ອງນຳພາ-ຊີ້ນຳດີເດັ່ນ ຈຳນວນ 05 ທ່ານ, ຍິງ 1 ທ່ານ.
ໃນຕອນທ້າຍ, ປະທານກອງປະຊຸມ ໄດ້ຍ້ອງຍໍຊົມເຊີຍຕໍ່ກັບພາກສ່ວນທີ່ກ່ຽວຂ້ອງວ່າ: ບັນດາສະຫາຍໄດ້ເຮັດໜ້າທີ່ການເມືອງທີ່ມີຜົນສຳເລັດຕາມການມອບໝາຍ ບົນຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍ່ຄືມະຕິກອງປະຊຸມໃຫຍ່ອົງຄະນະພັກຂັ້ນ ຂອງຕົນມາໄດ້ຮອດກາງສະໄໝແລ້ວ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ແລະ 2 ວາລະແຫ່ງຊາດ ທີ່ມີລັກສະນະພິເສດ ກໍຄືການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະແກ້ໄຂບັນຫາຢາເສບຕິດເຂົ້າສູ່ຊີວິດຕົວຈິງ. ທິດສະດີ, ແນວທາງທີ່ພວກສະຫາຍຮຽນມາຕ້ອງໄດ້ຮັບການທົດສອບ, ກວດສອບ ແລະ ຢືນຢັນຈາກພຶດຕິກຳຕົວຈິງ. ຍ້ອນແນວນັ້ນ, ບັນດາສະຫາຍ ຈົ່ງນຳເອົາບົດຮຽນທີໄດ້ຮຽນມາ ໄປທົດສອບ ຢູ່ໃນພຶດຕິກໍາແຫ່ງການສ້າງສາພັດທະນາປະເທດຊາດ ຕາມພາລະບົດບາດ ແລະໜ້າທີ່ຂອງຕົນ ອັນນີ້ຈະຊ່ວຍໃຫ້ພວກເຮົາເຫັນແຈ້ງວ່າ ອັນໃດຖືກ, ອັນໃດຜິດ, ອັນໃດສອດຄ່ອງເໝາະສົມ ຫຼື ບໍ່ສອດຄ່ອງ ບົນພື້ນຖານເດັດດ່ຽວປົກປ້ອງສິ່ງທີ່ຖືກຕ້ອງ ພ້ອມກັນນັ້ນ ກໍ່ຕັດສິນໃຈດັດແປງແກ້ໄຂອັນທີ່ບໍ່ຖືກຕ້ອງຢ່າງທັນການ ແລະຈາກພຶດຕິກຳຕົວຈິງນັ້ນ ບັນດາສະຫາຍຍັງມີໜ້າທີ່ຄົ້ນຄວ້າວິໄຈ ແລະ ສະຫຼຸບສັງລວມຢ່າງມີວິທະຍາສາດ ແລ້ວສະເໜີຄຳຄິດຄຳເຫັນ, ສະເໜີທິດທາງ, ວິທີການ ແລະມາດຕະການ ທີ່ເປັນໄປໄດ້ ແລະ ມີປະສິດທິພາບສູງ ເພື່ອປັບປຸງວຽກງານໃນກົມກອງໃຫ້ດີຂຶ້ນ.
ນອກນັ້ນ, ປະທານກອງປະຊຸມໄດ້ເນັ້ນໜັກຕື່ມວ່າ: ພວກສະຫາຍ ແມ່ນຜະລິດຕະພັນຮຸ່ນທີ I ຂອງລະບົບ 9 ເດືອນ ທີ່ມີຄຸນນະພາບ ຂອງສະຖາບັນ. ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ: ບັນດາສະຫາຍນັກສຶກສາ ທີ່ຈົບອອກໄປໃນເທື່ອນີ້ ຈະຮັກສາໄວ້ເຊິ່ງຊື່ສຽງ, ກຽດສັກສີ ຂອງຕົນ ກໍ່ຄືຂອງສະຖາບັນ, ການເຄື່ອນໄຫວ, ການປະພຶດທຸກຢ່າງ ຕ້ອງໄດ້ຮັບຄວາມໄວ້ເນື້ອເຊື່ອໃຈຈາກພັກ-ລັດ ແລະ ປະຊາຊົນ ເຂົາເຈົ້າຝາກຄວາມຫວັງໄວ້ນຳບັນດາສະຫາຍໝົດທຸກຄົນ…
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ