ປິດຊຸດຝຶກອົບຮົມຄະນະພັກເມືອງ ຊຸດທີ VI

          ໃນພິທີ ທ່ານ ປອ ນາງ ຈັນທາ ອ່ອນໄຊວຽງ ຄະນະພັກກະຊວງ, ຫົວໜ້າສະຖາບັນຄົ້ນຄວ້າວິທະຍາສາດກນປົກຄອງ ແລະຝຶກອົບຮົມ, ກະຊວງພາຍໃນ ໄດ້ຂຶ້ນຜ່ານບົດສະຫຼຸບການຝຶກອົບຮົມຕະຫຼອດໄລຍະ 15 ວັນ ໂດຍສັງເຂບວ່າ: ເນື້ອໃນດ້ານຫຼັກສູດໄດ້ແບ່ງອອກເປັນ 2 ທິດສະດີຄື: ໜຶ່ງ, ທິດສະດີການເມືອງ; ສອງ, ທິດສະດີບໍລິຫານລັດ ໂດຍໃຊ້ເວລາຝຶກອົບຮົມຕົວຈິງ 15 ວັນລັດຖະການ (ແຕ່ວັນທີ 06-24 ພະຈິກ 2023) ມີ 105 ຊົ່ວໂມງ. ໃນນີ້, ທິດສະດີການເມືອງ ມີ 16 ຫົວຂໍ້, ໃຊ້ເວລາ 10 ວັນ, ເທົ່າກັບ 70 ຊົ່ວໂມງ; ທິດສະດີບໍລິຫານຄຸ້ມຄອງລັດ ມີ 8 ຫົວຂໍ້, ໃຊ້ເວລາ 5 ວັນລັດຖະການ, ເທົ່າກັບ 35 ຊົ່ວໂມງ, ຮູບແບບການຝຶກອົບຮົມປະກອບດ້ວຍການຂຶ້ນຫ້ອງບັນຍາຍຂອງ ຄູ-ອາຈານທີ່ມີປະສົບການສູງທັງພາຍໃນ ສມປຊ ແລະຈາກການນໍາ ແລະອະດີດການນໍາລະດັບສູງ.

 ຊຸດຝຶກອົບຮົມຄັ້ງນີ້ມີຜູ້ເຂົ້າຮ່ວມຝຶກອົບຮົມທັງໝົດ 50 ສະຫາຍ, ຍິງ 6 ສະຫາຍ, ເຊິ່ງມາຈາກ 50 ເມືອງ ໃນ 17 ແຂວງ ແລະນະຄອນຫຼວງວຽງຈັນ; ໃນນີ້, ກໍາມະການພັກແຂວງ, ເລຂາພັກເມືອງ, ເຈົ້າເມືອງ ມີ 7 ສະຫາຍ; ວ່າການເລຂາພັກເມືອງ, ວ່າການເຈົ້າເມືອງ 1  ສະຫາຍ, ຮອງເລຂາພັກເມືອງ, ຮອງເຈົ້າເມືອງ 21 ສະຫາຍ, ຍິງ 2  ສະຫາຍ; ກໍາມະການປະຈໍາພັກເມືອງ, ຮອງເຈົ້າເມືອງ 11 ສະຫາຍ, ກໍາມະການປະຈໍາພັກເມືອງ 10 ສະຫາຍ, ຍິງ 4 ສະຫາຍ.

ຄາດໝາຍຂອງຫຼັກສູດ: ໜຶ່ງ, ຜູ້ເຂົ້າຝຶກອົບຮົມກໍາແໜ້ນພື້ນຖານທິດສະດີ ແນວທາງ ກໍ່ສ້າງສັງຄົມນິຍົມ ແລະແຜນພັດທະນາເສດຖະກິດຕາມທິດສັງຄົມນິຍົມຢ່າງມີຫຼັກການຮອບດ້ານຂອງພັກ; ສອງ, ຍົກສູງຂີດຄວາມສາມາດນໍາພາ ແລະໝູນໃຊ້ຫຼັກການບໍລິຫານຄຸ້ມຄອງລັດ ເຂົ້າໃນການບໍລິຫານວຽກງານຕ່າງໆ ຢູ່ໃນຂັ້ນເມືອງ ໂດຍນໍາໃຊ້ຫຼັກມູນທິດສະດີທີ່ໄດ້ຮຽນມາຢ່າງເປັນລະບົບເຂົ້າໃນການບໍລິຫານ, ການຄຸ້ມຄອງ, ການພັດທະນາ, ການປະສານງານ, ການຕິດຕາມກວດກາວຽກງານຢູ່ຂັ້ນຂອງຕົນ ທີ່ຮັບຜິດຊອບ ແລະປັບປຸງ, ແກ້ໄຂຂໍ້ຂັດແຍ່ງດ້ານຕ່າງໆ ຕາມລະບົບຫຼັກການ ທີ່ເໝາະສົມ. ຊຸດຝຶກອົບຮົມຄັ້ງນີ້ສາມາດບັນລຸໄດ້ຕາມຈຸດປະສົງ ແລະຄາດໝາຍທີ່ວາງໃວ້ທຸກປະການ.