ຫ້ອງຮຽນຊຸດເຝິກອົບຮົມຄູການເມືອງ ແລະ ການປົກຄອງໄລຍະສັ້ນ 3 ເດືອນແມ່ນຫ້ອງຮຽນໜຶ່ງທີ່ຂຶ້ນກັບສະຖາບັນການເມືອງ ແລະ ການປົກຄອງແຫ່ງຊາດ, ເຄື່ອນໄຫວຕາມພາລະບົດບາດ, ສິດ ແລະໜ້າທີ່ຂອງຕົນ, ເຄື່ອນໄຫວພາຍໃຕ້ການນໍາພາ-ຊີ້ນໍາ ຂອງສະຖາບັນການເມືອງ ແລະ ການປົກຄອງແຫ່ງຊາດ ເວົ້າລວມ; ເວົ້າສະເພາະແມ່ນການນຳພາ-ຊີ້ນຳ ຂອງຄູປະຈຳຫ້ອງ ແລະຄະນະຫ້ອງ. ມີນັກເຝິກອົບຮົມຕົວຈິງທັງໝົດ 55 ທ່ານ, ຍິງ 15 ທ່ານ. ສະນັ້ນ, ໃນຕອນເຊົ້າວັນທີ 12 ມັງກອນ 2024 ທີ່ຜ່ານມາ ທີ່ຕຶກສູນຂໍ້ມູນຂ່າວສານການເມືອງ ແລະການປົກຄອງ ຫ້ອງປະຊຸມຊັ້ນ 5 ຫ້ອງ 509, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປິດເຝິກອົບຮົມຄູການເມືອງ ແລະ ການປົກຄອງ ຊຸດທີ I ເຊິ່ງໄດ້ດໍາເນີນເປັນເວລາ 3 ເດືອນ ນັບແຕ່ວັນທີ 16 ຕຸລາ 2023-12 ມັງກອນ 2024
ໄລຍະຮຽນແມ່ນ 90 ວັນ, ມີ 13 ອາທິດ ແລະ 630 ຊົ່ວໂມງ ພາຍໃຕ້ການເປັນປະທານໂດຍ: ທ່ານ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ ມີຕາງໜ້າຄະນະຫ້ອງການ, ກົມ, ຄະນະຕ່າງໆ ແລະສູນຕ່າງໆກໍໃຫ້ກຽດເຂົ້າຮ່ວມ.
ໃນພິທີ ທ່ານ ປທ ແສງແກ້ວ ວົງລໍາພັນ, ຮອງຫົວໜ້າກົມຄຸ້ມຄອງການຮຽນ-ການສອນ ໄດ້ຜ່ານບົດສະຫຼຸບຕະຫຼອດໄລຍະຂອງການຮຽນ-ການສອນ ຊຶ່ງທ່ານໄດ້ລາຍງານວ່າ: ຫຼັກສູດການຮຽນ-ການສອນ ປະກອບດ້ວຍ 9 ວິຊາ, ມີທັດສະນະສຶກສາ ແລະມີວິຊາສອນຊຸດເຝິກອົບຮົມຄື:
- ວິຊາປັດຊະຍາ
- ວິຊາເສດຖະສາດການເມືອງ ແລະຄຸ້ມຄອງເສດຖະກິດ.
- ວິຊາຄວາມຮູ້ການເມືອງ-ສັງຄົມ
- ວິຊາການປົກຄອງລັດ
- ວິຊາກໍ່ສ້າງພັກ
- ວິຊາຈິດຕະສາດຜູ້ນໍາພາ ແລະຄຸ້ມຄອງ
- ວິຊາແນວຄິດ ໄກສອນ ພົມວິຫານ
- ວິຊາຄູການເມືອງ ແລະການປົກຄອງ1
- ວິຊາຄູການເມືອງ ແລະການປົກຄອງ 2(ພາກລົງເລິກແຕ່ລະຄະນະ)
- ປະຕິບັດຕົວຈິງ (ທັດສະນະສຶກສາ)
ນອກຈາກນັ້ນ, ຄະນະພັກ, ຄະນະນໍາສະຖາບັນການເມືອງ ແລະ ການປົກຄອງແຫ່ງຊາດ ໄດ້ເອົາໃຈໃສ່ໃຫ້ການນຳພາ-ຊີ້ນໍາຢ່າງໃກ້ຊິດ. ຄະນະຮັບຜິດຊອບທີ່ຖືກແຕ່ງຕັ້ງ ໄດ້ເອົາໃຈໃສ່ຕິດຕາມສະພາບການເຝິກອົບຮົມຢ່າງໃກ້ຊິດ, ຕິດແທດ ໂດຍມີການປະສານວຽກງານວຽກງານຕ່າງໆ ທີ່ກ່ຽວຂ້ອງ. ຄູ-ອາຈານຈາກສະຖາບັນການເມືອງ ແລະ ການປົກຄອງແຫ່ງຊາດ ແມ່ນມີປະສົບການສູງໃນການຂຶ້ນຫ້ອງສອນ, ມີຄວາມຮູ້, ຄວາມສາມາດທີ່ແນ່ນອນໃນການສົ່ງຄວາມຮູ້ໃຫ້ແກ່ຜູ້ຮຽນໄດ້ດີ; ຜູ້ເຂົ້າຮຽນມີຄວາມຕັ້ງໃຈໃນການຄົ້ນຄ້ວາສົນທະນາ ແລະຕັ້ງຄຳຖາມຕໍ່ຄູ-ອາຈານ ແລະນັກເຝິກອົບຮົມທັງໝົດລ້ວນແລ້ວແຕ່ແມ່ນມາຈາກ ຂົງເຂດໂຮງຮຽນພັກທັງໝົດຈຶ່ງເຮັດໃຫ້ມີຄວາມເປັນເຈົ້າການໃນການປະຕິບັດກົດລະບຽບ ທີ່ສະຖາບັນການເມືອງ ແລະ ການປົກຄອງແຫ່ງຊາດ ວາງອອກໄດ້ດີສົມຄວນ ຊຶ່ງທີ່ຜ່ານມາກໍ່ໄດ້ຍົກໃຫ້ເຫັນບັນດາຂໍ້ສະດວກ, ຂໍ້ຫຍຸ້ງຍາກ ແລະບົດຮຽນທີ່ຖອດຖອນໄດ້ຊຶ່ງມັນສະແດງອອກໃຫ້ເຫັນວ່າ: ຜົນການປະເມີນ ສາມາດສັງລວມຄ່າລະເລ່ຍແຕ່ລະດ້ານແມ່ນຢູ່ໃນລະດັບດີຫຼາຍ (ກວມ 80%).
ຕີລາຄາຄວາມຮັບຮູ້ ອີງໃສ່ຄະແນນ ຂອງຜູ້ເຂົ້າຮຽນສາມາດປະເມີນໄດ້ດັ່ງນີ້:
- ຮັບຮູ້ໃນລະດັບດີເລີດເກຼດ A ມີ 19 ຄົນ, ສະເລ່ຍ 55 %;
- ຮັບຮູ້ໃນລະດັບດີຫຼາຍ ເກຼດ B+ ມີຄົນ, ສະເລ່ຍ 45%;
ເວົ້້າລວມແລ້ວຜົນໄດ້ຮັບລວມຂອງການຈັດຕັ້ງຮ່ຳຮຽນໃນຊຸດນີ້ ແມ່ນຢູ່ໃນລະດັບດີຫຼາຍ.
ເພື່ອເປັນການຢັ້ງຢືນຄືນຜົນສຳເລັດຂອງການເຝິກອົບຮົມ. ທ່ານ ຮສ. ພູວົງ ອຸ່ນຄຳແສນ ໄດ້ເປັນກຽດມອບໃບຢັ້ງຢືນໃຫ້ນັກເຝິກອົບຮົມ ຈຳນວນ 55ທ່ານ, ຍິງ 15ທ່ານ. ພ້ອມທັງໃຫ້ກຽດໂອ້ລົມ ແລະໃຫ້ທິດເຍືອງທາງຕໍ່ກັບນັກເຝິກອົົບຮົມໃນການປະຕິບັດໜ້າທີ່ວຽກງານໃນຕໍ່ໜ້າຄື: ຕ້ອງເພີ່ມທະວີຄວາມຮູ້, ຄວາມສາມາດໃຫ້ເລິກເຊິ່ງ ແລະຫຼາຍເທົ່າຕົວ ທາງດ້ານທິດສະດີ, ຫຼັກມູນ, ກົດເກນ ແລະພຶດຕິກໍາຕົວຈິງ ໃນແຕ່ລະສາຂາທີ່ຕົນເອງທີ່ໄດ້ຮຽນມາ. ຈາກບົດຮຽນທີ່ຖອດຖອນໄດ້ນັ້ນຢາກໃຫ້ກັບໄປພັດທະນາສ້າງເປັນປຶ້ມສອນ, ບົດຄົ້ນຄວ້າ, ບົດນໍາສະເໜີທີ່ຮັບປະກັນລັກ ສະນະວິທະຍາສາດ, ຈາກການເຝິກອົບຮົມຕົວຈິງຄວນມີວິທີຖ່າຍທອດຄວາມຮູ້, ຄວາມສາມາດຈາກສິ່ງທີ່ໄດ້ຄົ້ນຄວ້າມາໃຫ້ໄດ້ຮັບປະສິດທິຜົນ. ສືບຕໍ່ຮັດແໜ້ນຄວາມສາມັກຄີ, ປະສານສົມທົບ ແລະສະໜອງຂໍ້ມູນທີ່ສໍາຄັນຕ່າງໆໃຫ້ເຊິ່ງກັນ ແລະກັນໃນຕໍ່ໜ້າ.
ຂ່າວ: ນ. ທິດດາວອນ ດວງປະເສີດ
ຮູບພາບ:ຄອນສະຫວັນ ແສນຍານຸພາບ
ບັນນາທິການ: ປທ ບຸນປັນ ສຸມຸນທອງ